Nove treitos de estradas de Galicia, declarados de alto risco de accidente con animais

A presenza de xabarís nas estradas é un problema que foi en aumento nos últimos anos e que preocupa seriamente a condutores e autoridades, de feito, nove treitos de estradas de Galicia están considerados como altamente perigosos pola presenza de xabarís ou doutros animais como corzos ou raposos.

A nacional VI sería, na nosa comunidade, a que máis risco ten de que suframos un accidente pola irrupción dun animal.

Os treitos declarados de alto risco por animais en Galicia concéntranse en estradas do norte: Foz, San Cibrao, Oleiros, Narón, Pontedeume, Castro de Rei e a zona entre Begonte e Outeiro de Rei. Na provincia de Pontevedra só hai un, na rotonda de ENCE, e na de Ourense, ningún.

A mediados de xaneiro, un xabaril coouse na AP-9 e provocou un accidente múltiple no que só resultaron feridas leves algunhas persoas, pero non sempre se ten tanta fortuna e en moitos casos prodúcense sinistros con feridos de gravidade e mesmo con vítimas mortais.

Os xabarís son os responsables de provocar o 45 % dos sinistros nas estradas e, a pesar de que a Xunta abriu a súa caza libre e indiscriminada para tratar de reducir a súa poboación, parece que todo esforzo está a ser insuficiente.

De feito, dende Tráfico aseguran que o problema afecta a toda Europa, e que traballan para buscar unha solución global apoiada nas novas tecnoloxías.