Dez anos do accidente suicida de Germanwings, que cambiou os protocolos aéreos de seguridade
O copiloto estrelou intencionadamente o avión contra unha montaña dos Alpes franceses
Tiña problemas psicolóxicos. Estaba de baixa pero ocultoulle ese estado á compañía.
No accidente suicida morreron cento cincuenta persoas, cincuenta delas eran españolas
O suceso modificou os protocolos de seguridade aéreos. Agora sempre hai dúas persoas na cabina.
Fai dez anos da traxedia que marcou un antes e un despois nos protocolos de seguridade da aviación: o accidente suicida dun avión de Germanwings nos Alpes franceses. O copiloto, que estaba a tratamento psiquiátrico, estrelouse adrede contra unha montaña. E morreron as 150 persoas que ían a bordo.
Algunhas familias dos 150 falecidos volveron aos Alpes franceses para lembrar o suceso, do que fai dez anos. Morreron setenta e dous alemáns, cincuenta españois e pasaxeiros doutras quince nacionalidades. Flores e un minuto de silencio a poucos metros de onde caeu o avión, a uns cen quilómetros ao noroeste de Niza.
O avión de Germanwings engalou de Barcelona o 24 de marzo do 2015. Despois de 27 minutos voando, cando estaba na maior altitude de cruceiro, uns 11.500 metros, a aeronave comezou un descenso rápido e inesperado, a uns 650 quilómetros á hora.
O copiloto decidira, deliberadamente, estrelar o aparello contra unha montaña dos Alpes onde non había casas. Era Andreas Lubitzs, un piloto de 28 anos que levaba un ano na compañía de baixo custo do grupo Lufthansa. Era alemán e arrastraba graves trastornos depresivos e psicóticos desde había anos. Non se decataron diso os examinadores médicos, que certificaron que si podía manexar un avión.
No momento do accidente suicida tiña unha baixa médica dun neurólogo e dun psiquiatra, pero el nunca deu esa información á compañía. A lei de segredo médico impediu ás autoridades sanitarias advertir dese perigo.
O copiloto, aproveitando que o piloto fora ao baño, pechouse na cabina e fixo o descenso mortal. Desde entón cambiaron algúns protocolos. Agora é obrigado que haxa sempre dúas persoas na cabina dos avións. Os controis médicos para a tripulación son máis estritos e controlan con máis detalle aspectos da saúde mental. Tamén agora é a Seguridade Social e non o traballador quen notifica as baixas médicas ás empresas.
