Díaz detalla que o bono social de emerxencia iría a hipotecas de ata 250.000 euros

A vicepresidenta segunda do Goberno e líder de Sumar Yolanda Díaz detallou este martes que o bono social de emerxencia para os fogares hipotecados que quere poñer en marcha tería un custo de 1.000 millóns de euros e sería para hipotecas de ata 250.000 euros e unha antigüidade de ata dez anos.

En declaracións na Cadea Ser, a líder de Sumar, candidata ás eleccións xerais do 23 de xullo, explicou que este bono, que xa anunciou a pasada fin de semana, busca axudar as familias angustiadas coas subidas de cotas hipotecarias variables tras as alzas de tipos do Banco Central Europeo (BCE).

"Non escoito dicir ao Goberno que non comparte a política do BCE", lamentou Díaz.

Incidiu en que hai moita xente que o está pasando mal coa subida do custo da vida nesta crise inflacionista.

Díaz tamén criticou que o líder do PP Alberto Núñez Feijóo cuestionase os datos de emprego ou fiscais.

"Non está preparado para ser presidente do Goberno (...), non sabe de que está a falar (...) ou por falta de rigor ou porque mente sen control", criticou a vicepresidenta.

Díaz, dixo que non vetou a ministra de Igualdade, Irene Montero, porque non é o seu estilo, e sobre a configuración das listas insistiu en que fixeron o que tiñan que facer e que están "moi satisfeitas" do resultado.

A ministra de Traballo sinalou que o acordo foi moi difícil e congratulouse de que se configuraron unhas listas "con achegas de moitas persoas independentes e cunha confluencia de formacións políticas como xamais se conformou desde a Transición".

"Non é o noso estilo vetar", contestou á pregunta de se houbo un veto expreso a Irene Montero. "Isto foi moi difícil, houbo renuncias, houbo de todo", apuntou, antes de poñer en valor o traballo da ministra de Igualdade e do titular de Consumo, Alberto Garzón, entre outros.