Dimite a secretaria de Estado do Tesouro británica por sospeitas de corrupción

A secretaria de Estado do Tesouro e da City (distrito financeiro de Londres) do Reino Unido, Tulip Siddiq, presentou este martes a súa dimisión para non converterse nunha "distracción" para o Goberno, tras ser acusada de beneficiarse dos seus vínculos co réxime da exprimeira ministra de Bangladesh, Sheik Hasina, tía carnal súa.

Nunha carta dirixida ao primeiro ministro, Keir Starmer, Siddiq sinalou que renuncia a pesar de que unha investigación independente do responsable dos estándares éticos do Executivo achou que non infrinxiu o código de conduta ministerial.

Así, convértese na segunda compoñente do gabinete en dimitir tras a exministra de Transportes Louise Haigh, enfrontábase a chamamentos para a súa dimisión desde a aparición do seu nome en decembro nunha investigación anticorrupción aberta en Bangladesh contra Hasina.

Siddiq, considerada moi próxima a Starmer, tiña precisamente na súa carteira a loita contra o financiamento ilegal e a corrupción.

A pesar de lembrar que a investigación levada a cabo polo responsable de estándares éticos, Laurie Magnus, "confirmou que non rompera o código ministerial" e que tampouco se acharon probas de que actuase de forma inadecuada, dixo que quedara claro que a súa continuidade sería unha "distracción" para o Goberno.

O diario Financial Times revelou recentemente que Siddiq recibira en 2004 un apartamento de dous cuartos en Londres de mans dun promotor con vínculos co partido de Hasina, a Liga Awami, e que tamén vivira noutras propiedades relacionadas co antigo réxime da súa tía, que se viu obrigada a dimitir o pasado 5 de agosto tras unha onda de protestas.

O propio Starmer respondeu noutra carta á dimisión de Siddiq, na que lle agradeceu polo seu traballo para impulsar as reformas financeiras na City.

"Aprecio que para acabar coas actuais distraccións para poñer en marcha o noso plan para cambiar o Reino Unido, tomases unha difícil decisión e quero aclarar que a porta estará aberta para ti máis adiante", escribiu.

Ao mesmo tempo, o Goberno anunciou o nomeamento da deputada Emma Reynolds para substituír no posto a Siddiq.