O fiscal especial asegura que había probas suficientes para condenar a Trump por interferencia electoral

O fiscal especial Jack Smith, que investigou os presuntos intentos de Donald Trump de subverter os resultados das eleccións de 2020 nos EUA, indica no seu informe final que había probas suficientes para condenalo.

Parte do informe de Smith foi enviado este martes ao Congreso polo Departamento de Xustiza, unha vez que a xuíza Aileen Cannon deu luz verde á súa difusión.

No documento conclúe que Trump, que foi presidente de 2017 a 2021, realizou "unha serie de esforzos criminais para reter o poder" despois de ser derrotado polo presidente Joe Biden nas eleccións de novembro de 2020.

E cita, entre outros, a “presión sobre funcionarios estatais”, a utilización de "electores fraudulentos” ou o ataque perpetrado ao Capitolio dos Estados Unidos o 6 de xaneiro de 2021 para impedir que se certificase a vitoria de Biden.

Segundo o fiscal especial, que dimitiu este mes, había probas suficientes para condenar a Trump nun xuízo se a súa vitoria nas eleccións de 2024 non fixese imposible que a acusación continuase.

O fiscal especial tamén presentou unha acusación formal contra Trump en Florida por reter ilegalmente documentos clasificados na súa casa particular despois de deixar o cargo, pero o documento segue considerado como confidencial e non foi aínda difundido.

Donald Trump: "Jack é un fiscal descerebrado que non puido lograr que o seu caso fose xulgado antes das eleccións, que gañei de maneira esmagadora"

O presidente electo dos Estados Unidos Donald Trump chamou "descerebrado" ao fiscal especial Jack Smith tras coñecer o informe final da investigación sobre presuntas interferencias para reverter a súa derrota electoral en 2020.

"Jack é un fiscal descerebrado que non puido lograr que o seu caso fose xulgado antes das eleccións, que gañei de maneira esmagadora. Os VOTANTES FALARON!!!", asegura Trump tras indicar que Smith foi incapaz de "procesar con éxito o opoñente político do seu xefe, o deshonesto Joe Biden".

O presidente electo acúsao de escribir un informe baseado en información que o Comité Non Electo de Matóns e Piratas Políticos DESTRUÍU E ELIMINOU ILEGALMENTE, porque mostraba que eu era totalmente inocente e o completamente culpables que eran Nancy Pelosi e outros".

Trump será o primeiro presidente da historia dos EUA condenado por un delito penal, tras ser declarado culpable e sentenciado polos pagos ilegais realizados en 2016 á actriz porno Stormy Daniels para que non falase dunha suposta relación entre ambos.