Doce anos de prisión para o home que tentou matar a súa exparella a tiros no Grove

A sección cuarta da Audiencia Provincial de Pontevedra condenou a 12 anos de cárcere un home que en 2018 tentou asasinar a súa exparella, coa que mantivo unha relación durante 25 anos, disparándolle en dúas ocasións.

Os feitos ocorreron, segundo o tribunal, "tras os reiterados rexeitamentos e negativas ás súas peticións de perdón e de retomar a relación sentimental, consciente de que a ruptura era definitiva". A Sala considerouno autor dun delito de tentativa de asasinato, de malos tratos habituais, de quebrantamento de condena e de tenza de armas prohibidas.

Ademais da pena de prisión, impúxolle a prohibición de comunicarse coa vítima por calquera medio durante 26 anos, con instalación de dispositivo de control telemático para o seu cumprimento, así como o pago dunha indemnización de 100.000 euros, dos cales 43.000 euros son en concepto de dano moral.

Continuas humillacións

O tribunal considera probado que o acusado, que mantivo unha relación sentimental durante 25 anos coa vítima ata a súa ruptura, en agosto de 2018, someteuna, "case desde o inicio da súa relación e, en maior medida, desde o ano 2015", sempre no domicilio común e en presenza da filla de ambos, "a continuas humillacións e menosprezos, iniciando constantes disputas relativas ás decisións domésticas, persoais e á educación da filla en común, nas que lle gritaba e insultaba".

A Sala subliña que "a controlaba cunha actitude sumamente celosa e violenta". Como exemplos, indica que lle rompía as súas cousas, empuxábaa, collíaa polo pescozo e propináballe golpes e labazadas.

Desta forma, segundo as maxistradas, "vulneraba a súa personalidade e a súa autoestima, conseguindo crear un clima de terror para que acatase todas as súas decisións, dobregando a súa vontade, anulada polo profundo medo que a súa parella lle infundía polo seu carácter violento e dominante".

Na resolución, ademais, destacan que o acusado incumpriu as penas de prohibición de aproximación e de comunicación que lle impuxeron a partir do mes de novembro de 2018, "sen importarlle a ineficacia da resolución xudicial que as impoñía".

Día dos feitos

Nunha desas ocasións, o 5 de decembro de 2018, segundo relatan no ditame, foi ao domicilio da súa exparella, a pesar da existencia da pena de afastamento que llo prohibía, esperou a súa chegada, sobre as 11:30 horas, e entrou na vivenda "coa decidida vontade de acabar coa súa vida, consciente de que a ruptura era definitiva".

As xuízas consideran acreditado que o condenado foi ao cuarto onde a vítima estaba deitada e, suxeitando un coitelo de cociña, "recriminoulle que o denunciase e anuncioulle a morte", chegando a poñerse sobre ela e a colocarlle un coitelo no pescozo en repetidas ocasións.

Na sentenza indican que, acto seguido, saíu do cuarto, pechou a porta da vivenda con chave, baixou as persianas de toda a casa, e, "abalanzouse sobre ela e golpeouna co canón dun revólver no lado dereito da cara e disparoulle, sen perforala, porque a vítima lle golpeou a man e desviou o tiro, conseguindo que a munición só lle rabuñase a fazula".

A continuación, segundo a Sala, "tentou poñerlle a pistola na tempa e disparoulle de novo, conseguindo a muller, co seu forcexo, que o tiro lle alcanzase no lado dereito do pescozo". Ademais, sinala que, tras iso, a denunciante quedou na cama finxindo estar inconsciente e o procesado disparouse a si mesmo, circunstancia que aproveitou a vítima para saír do cuarto, pero non do seu domicilio, porque o condenado pechara a porta "para asegurar a culminación da súa intención de matala e que ela non puidese escapar", polo que pediu auxilio pola xanela.

O acusado chegou a declarar, o pasado 16 de xullo, que non lembraba os feitos que aconteceron ese día, pois, segundo contou, estivo en coma durante un mes. Pese a iso aceptou o acontecido os doce anos de cárcere.

A sentenza aínda non é firme, pois cabe a posibilidade de presentar recurso ante o TSXG.