Domingo de Ramos en Lugo coa procesión da Virxe das Dores

Tarde de Domingo de Ramos en Lugo coa emotiva procesión da Virxe das Dores. O acto relixioso comezaba sobre as sete da tarde no convento dos Franciscanos. 

Este desfile procesional honrou, coma cada Semana Santa, o sufrimento de María ante a inminente paixón do seu fillo Xesús.

"Somos 40 portadores os que levamos a Virxe e 30 mulleres que portan o Cristo", di un dos confrades.

A imaxe da Virxe, con expresión de dor e ataviada cun manto de loito, percorreu varias rúas da cidade, regresaba á Praza Maior e remataba novamente fronte ao convento dos Franciscanos.

"É unha procesión que recuperou esta confraría hai anos porque era unha das máis antigas que había aquí en Lugo e desapareceu co tempo. Desde o ano 2010 estamos saíndo seguido", engade outro confrade.

A imaxe da Virxe estivo acompañada polos confrades e os fieis nun ambiente de respecto e sobriedade. As candeas e os adornos florais enmarcaron o acto procesional. 

Os devotos participaron na procesión, na que o silencio, apenas interrompido por marchas procesionais interpretadas por bandas de música, envolveu este exercicio relixioso que, coma cada ano, invita á reflexión sobre o amor materno e o sacrificio.

Este é un dos actos que tradicionalmente invita os devotos ao recollemento espiritual que vai caracterizar o resto da Semana Santa.