Rescatan varios veciños dun edificio ardendo en Vigo

Os Bombeiros de Vigo rescataron este xoves varios veciños dun edificio no que se declarou un incendio na rúa Isaac Peral.

Segundo informou o 112 Galicia, o incendio iniciouse no sétimo andar pasadas as 18:00 h e obrigou ao traslado dunha muller cunhas queimaduras de consideración a un centro hospitalario.

Varios particulares alertaron do incendio ao ver o fume e as lapas, mesmo desde rúas próximas.

Ata o lugar acudiron os Bombeiros de Vigo, axentes da Policía Nacional e Local e persoal sanitario do Servizo de Urxencias Sanitarias de Galicia-061.

Os equipos de intervención rescataron con escaleira varios veciños do noveno andar que quedaran atrapados polo fume. Ademais, unha muller foi evacuada ao hospital con queimaduras.

Segundo as primeiras hipóteses, o incendio puido iniciarse na cociña da vivenda afectada. Os Bombeiros continúan traballando na zona, aínda que indican que a situación está controlada.

A pegada do fume é evidente no interior do edificio. Todo o tiro de escaleiras cheira a queimado. O incendio comezou no sétimo, onde vive unha muller duns oitenta anos. Unha candea que tiña prendida sobre unha mesa acabou provocando un incendio no piso. Foi a súa veciña, coa que convive dende hai cinco décadas, a primeira en acudila. 

"Foi dantesco porque eu oín os berros", conta Gloria aínda co susto no corpo, "pero non sabía onde era. Cando abrín a porta, saiu unha fumareda e foi horroroso porque, ao me achegar, non vía máis ca fume. E ela dentro da casa e non quería sair".

Os bombeiros utilizaron o camión-escaleira para baixar, primeiro, as nenas e logo ao home co can. A veciña do sétimo sufriu queimaduras na cara e nunha perna pero a súa familia di que está ben.