Un home, con queimaduras tras un incendio na cociña dunha cafetería de Ourense
A rápida intervención dos bombeiros evitou que as lapas se estendesen, pero a cociña ardeu case por completo
Un home quedou ferido e tivo que ser trasladado a un centro hospitalario tras un incendio rexistrado na cociña dunha cafetería de Ourense, segundo informou o CIAE 112 Galicia.
Sobre as 21:20 horas deste martes un particular chamou a Emerxencias para alertar de que saía moito fume dunha cafetería situada na rúa Progreso. Naquel momento todas as persoas atopábanse no exterior do local, pero una delas necesitaba asistencia sanitaria porque sufrira queimaduras.
Ao momento trasladáronse os bombeiros, que comprobaron que o lume afectaba á cociña do establecemento e o fume estendeuse por todo o bar. A rápida intervención evitou que as chamas se estendesen, pero a cociña ardeu case por completo.
Ademais dos bombeiros de Ourense, no operativo participaron tamén a Policía Nacional, a Policía Local e efectivos de Urxencias Sanitarias de Galicia-061, que trasladaron o ferido, un empregado da cafetería, ao Complexo Hospitalario Universitario de Ourense.
