Ecuador sufoca os motíns en sete cárceres e libera máis de 150 reféns

Ecuador logrou controlar e sufocar os motíns carcerarios iniciados de xeito simultáneo coa vaga de violencia criminal vivida esta semana e liberou os máis de 150 reféns que permanecían retidos polos presos, salvo un garda que faleceu presuntamente nun tiroteo.

Anunciouno onte á noite nunha mensaxe en redes sociais o presidente de Ecuador, Daniel Noboa, quen confirmou a liberación da totalidade dos reféns que desde inicios de semana permanecían retidos nas prisións das cidades de Esmeraldas, Latacunga, Ambato, Cuenca, Azogues, Loja e Machala.

Os motíns convertéronse no foco desta crise de violencia iniciada o martes cunha serie de atentados e accións intimidatorias que incluíron o asalto dun grupo armado a unha canle de televisión, o que levou o Goberno a declarar a "guerra" contra estas bandas, ás que agora cataloga como grupos terroristas.

Nos cárceres chegaron a ser polo menos 178 os reféns entre gardas carcerarios e persoal administrativo que comezaron a ser liberados a contagotas nos días seguintes ao estalido da crise ata que este sábado se conseguiu a liberación do resto, algo máis de 150, segundo as últimas cifras oficiais.

Tanto para o funcionariado de prisións como para as súas familias resultaron cinco días de angustia e desesperación, que se saldaron con polo menos catro falecidos, entre eles un garda e tres presos.

Noboa contra os líderes criminais

A vaga de violencia comezou tras facerse pública a intención do Goberno de Daniel Noboa de poñer en marcha o seu plan para recuperar o control dos cárceres, moitos dominados por estas bandas que protagonizaron desde 2020 unha serie de masacres con máis de 450 presos asasinados.

Para conseguilo, Noboa busca illar os seus líderes ata que estean construídos dous cárceres inspirados no "modelo Bukele".

Durante os catro primeiros días da declaración do "conflito armado interno" as forzas de seguridade detiveron 1.105 presuntos delincuentes, 94 deles por presunto terrorismo, e abateron cinco presuntos "terroristas". Ademais, dous policías faleceron nos operativos.