Israel anuncia unha ofensiva total contra Gaza sen restricións

O ministro de Defensa de Israel Yoav Gallant anunciou este martes que o país lanzará "unha ofensiva total" contra a Franxa de Gaza que cambiará totalmente a situación sobre o terreo, aínda que non entrou en aspectos concretos.

"Levantei todas as restricións. Recuperamos o control da fronteira e estamos a pasar a unha ofensiva total", dixo Gallant ao reunirse con militares israelís e combatentes.

"Loitastes con gran valentía. Vistes contra que combatemos: contra animais humanos. Grazas á vosa acción heroica, teredes o dereito de cambiar a realidade aquí. Veredes a transformación. Hamas quixo un cambio, e cambiará 180 graos respecto ao que pensaban. Arrepentiranse dese momento: Gaza nunca volverá ser o que era", prometeu Gallant.

O saldo de vítimas polo ataque sorpresa que Hamas, a organización islamista que domina Gaza, lanzou o sábado pasado contra varios lugares próximos á franxa, supera os 900 mortos e os 2.400 feridos, medio milleiro deles graves.

"Non pode ser que se asasine nenos israelís no campo e Hamas siga existindo. Levantei todas as restricións: matarase a calquera que combate contra nós, usando todos os medios", insistiu o ministro de Defensa israelí.

No lado palestino, os bombardeos aéreos israelís acabaron coa vida de máis de 900 habitantes de Gaza, 260 son nenos, 230 mulleres e oito xornalistas, segundo as autoridades gazatís. A isto engádense uns 1.500 milicianos de Hamas que morreron durante o ataque ou nos combates posteriores en territorio de Israel, segundo o reconto do exército israelí, que este martes recuperou o control da zona.

Por todo isto as autoridades solicitan un corredor humanitario. Residentes de Gaza sinalaron que os bombardeos aéreos efectuados desde este luns son moi diferentes dos habituais en anteriores enfrontamentos, xa que son moito máis destrutivos e lánzanse sen o aviso previo.

España envía dous avións militares a Israel

O Ministerio de Defensa enviará ao longo da tarde dous avións A330 para traer uns 500 españois desprazados por turismo ou negocios a Israel, segundo informou este martes en declaracións aos medios a ministra de Defensa en funcións Margarita Robles.

Un deles saíu ás 15:30 deste martes e está previsto que chegue a Tel Aviv ás 20:00 para embarcar parte dos desprazados. A esa hora sairá de España unha segunda aeronave do mesmo tipo para evacuar o resto de españois que viron os seus voos comerciais cancelados. 

Albares informou de que os españois "bloqueados" tentando chegar a España "poderían ser centos", polo cal se empezou a facer "unha primeira lista" cos que se atopan no aeroporto para ter unha "idea exacta de cantos poden ser" e traer os desprazados pero non os residentes.

"Ningún español que estea por turismo ou traballo vai quedar máis tempo, e dado que Vueling e Iberia cancelaron todos os seus voos ata o domingo, non imos esperar máis e enviaranse avións militares, en colaboración con Defensa", comentou Albares.

Ofensivas deste martes 

Cada catro horas, un bombardeo. Israel lanzou este martes ataques masivos contra a Franxa de Gaza, ignorando a ameaza de Hamas de matar os reféns secuestrados e co risco de aumentar as vítimas civís. Só cun obxectivo.

"Chegar a calquera lugar. Os milicianos de Hamas non terán onde agocharse", di o portavoz do exército israelí.

O goberno de Netanyahu di que matou centos de axentes de Hamas e dous altos cargos do grupo terrorista.

Israel asegura que recuperou o control dos territorios asaltados, pero Hamas contraataca con máis bombardeos desde o Líbano e no sur do país, onde chamaron á poboación civil a marchar.

Preto de Gaza, comandos de milicianos a pé atacaron un kibbutz hebreo e mataron casa por casa unhas 200 persoas, entre elas 40 bebés, parte dos cales apareceron decapitados. 

"Non é unha guerra, é un ataque terrorista", di un militar israelí, que asegura que non vira algo así en 40 anos de servizo.

O balance de falecidos en catro días de conflito dá idea da dureza desta guerra. Máis de 900 en Israel, a mans dos terroristas de Hamas; 830 na Franxa de Gaza, polos ataques do exército israelí.

Do que non se sabe nada é dos máis de cen reféns secuestrados o sábado por Hamas. A desesperación apodérase das súas familias, máis cando ameazaron con matalos publicamente se Israel continúa cos ataques.

Hizbullah di que destruíu un tanque israelí con dous mísiles 

O grupo xiíta libanés Hizbullah asegurou este martes que lanzou dous mísiles teledirixidos contra un tanque israelí e o destruíu "completamente", no medio de renovadas hostilidades na zona fronteiriza entre o Líbano e Israel e de ataques de artillería por parte do Estado xudeu.

"En resposta aos ataques israelís, que tiveron como obxectivo varias posicións de observación da Resistencia Islámica, esta tarde os nosos combatentes atacaron con dous mísiles teledirixidos un tanque israelí tipo Zelda, que foi alcanzado e completamente destruído", afirmou o movemento político e armado nun comunicado. 

Axuda humanitaria da UE

Albares tamén dixo que solicitará explicacións á Comisión Europea sobre que quere dicir "revisión" da axuda da UE a Palestina e insistiu en que retirar as axudas sería "contraproducente": "Non podemos mesturar unha organización terrorista como Hamas co pobo palestino".

"O que imos necesitar nos próximos días non é menos axuda a Palestina senón moita axuda humanitaria", precisou o ministro, que lembrou que España leva décadas cooperando coa Autoridade Nacional Palestina e os organismos de Nacións Unidas. "Somos extraordinariamente escrupulosos con ese diñeiro e xamais houbo ningún problema", engadiu Albares.

Israel recupera o control na zona fronteiriza coa Franxa de Gaza

Os 1.500 corpos de combatentes de Hamas que Israel afirma que atopou no seu territorio eleva a máis de 3.000 o número de mortos ata o momento na nova guerra entre Israel e Hamas, en que polo menos 6.000 persoas quedaron feridas.

Israel cifra en polo menos 900 os civís e militares mortos con máis dun centenar de desaparecidos presumiblemente secuestrados, e en Gaza contabilízanse preto de 700 vítimas mortais, entre elas 140 nenos, no terceiro día de guerra.

Israel eleva a 2.600 os feridos e en Gaza a cifra supera os 3.700, segundo o último reconto do Ministerio de Sanidade da Franxa, que sofre intensos bombardeos por parte da aviación israelí, con ataques a infraestruturas civís e edificios residenciais.

Hamas asegurou que os bombardeos provocaron a morte de polo menos catro reféns israelís do centenar que o grupo di ter secuestrado desde o sábado.

Israel recuperou o control da zona fronteiriza coa Franxa de Gaza e logrou parar a infiltración de milicianos de Hamas no seu territorio, informou o exército israelí este martes, o cuarto día de guerra contra o movemento islamita.

"Restauramos practicamente o control completo no valo fronteirizo con Gaza, estamos a restaurar e organizar o perímetro", indicou a medios internacionais Richard Hecht, portavoz do exército.

Israel anunciou tamén a mobilización de 300.000 reservistas. 

Máis de 187.000 desprazados en Gaza

Os desprazados dentro da Franxa de Gaza por mor da guerra aumentan nas últimas 24 horas e superan os 187.000; dáse por descontado que este número subirá nas próximas horas, segundo Nacións Unidas.

Deles, uns 137.500 desprazados están refuxiados en escolas da Axencia de Nacións Unidas para os Refuxiados Palestinos (UNRWA), onde as condicións son extremadamente precarias e a subministración de auga potable é moi limitada, dixeron representantes deste organismo.