O Sergas notifica a morte dun home de 75 anos coa covid no CHOP

Galicia chega ao Nadal con 22.349 casos activos, 2.087 máis ca na xornada anterior e moi preto do pico da terceira vaga (22.911), o máis alto de toda a pandemia. 

As infeccións activas distribúense do seguinte xeito por áreas sanitarias:

-Vigo: 6.398

-A Coruña: 3.828

-Pontevedra: 3.245

-Santiago: 3.196

-Ourense: 2.871

-Lugo: 1.740

-Ferrol: 1.071

Novo máximo

Ademais, segundo o Servizo Galego de Saúde, suma 3.100 novos contaxios confirmados nun só día. Con este dato, volve alcanzar o seu máximo dende o inicio da crise sanitaria.

A área sanitaria da Coruña encabeza hoxe a cifra de positivos, con 638, unha marca que non acadara nin sequera na vaga do inverno pasado sendo unha das áreas máis afectadas. Daquela o pico máximo fora de 549 casos nun día.

Vigo computou nas últimas horas 636, cifra á que tampouco chegara antes. Santiago segue subindo ata os 545. Desde principios de semana case multiplicou por 4 o número de casos diarios. 

Ourense tampouco é allea ao empeoramento da situación. Hoxe computa 434 casos novos e Pontevedra 370, tamén superan as marca máis alta que tiñan. Igual ca Lugo, con 276, e Ferrol con 201. 

Situación hospitalaria

Se comparamos a situación sanitaria coa de hai un ano: tal día coma hoxe había 319 persoas ingresadas, 54 delas nas UCI. Este sábado son 271 as hospitalizadas, con 50 críticas.

Naquela vaga os ingresos en Galicia chegaron a ser 1.452, a finais de xaneiro, aínda que había unha diferenza importante con este momento porque a maioría da poboación non estaba vacinada. 

Novo falecemento

Nas últimas horas notificouse un falecemento no complexo hospitalario de Pontevedra (CHOP). Segundo informa o Sergas, o home de 75 anos presentaba patoloxías previas. Desde hai dous meses, cando os casos comezaban a subir, morreron 95 persoas coa covid.