Filipe VI inicia na Zarzuela a súa segunda rolda de consultas para a investidura
Filipe VI inicia na Zarzuela a súa segunda rolda de consultas para a investidura
O favorito é Pedro Sánchez, pero o xefe do Estado non poderá sondar varios dos seus aliados parlamentarios porque se negan a acudir á cita
![](https://img-g24-crtvg.flumotion.com/prog24/2023/20231001/rei.png)
O rei Filipe VI iniciará este luns 2 de outubro no Palacio da Zarzuela a súa segunda rolda de consultas para designar candidato á investidura despois de que a súa anterior aposta, o líder do PP Alberto Núñez Feijóo, non lograse os votos suficientes para ser elixido.
Desta volta, o favorito é o socialista Pedro Sánchez, aínda que o xefe do Estado non poderá sondar varios dos seus aliados parlamentarios porque se negan a acudir a estas reunións.
Tras o resultado da segunda votación de investidura de Feijóo, en que o líder do PP volveu ser derrotado, a presidenta do Congreso a socialista Francina Armengol acudiu o venres a Zarzuela para informar o Xefe do Estado do sucedido.
A Casa Real confirmou enseguida que non ía dilatar os prazos e que este mesmo luns empezaría a segunda rolda de consultas.
O rei recibe a Pedro Sánchez na Zarzuela
O rei retomará os contactos ás dez da mañá do martes co presidente do Goberno e secretario xeral do PSOE Pedro Sánchez, que na primeira rolda de consultas xa se mostrou disposto a someterse ao debate de investidura.
O PSOE vese capaz de tecer alianzas para superar a votación e reeditar o Goberno de coalición, como conseguiu para facerse coa maioría na Mesa do Congreso, e así llo expoñerá ao xefe do Estado. Pero Filipe non poderá sondar catro dos socios que necesita Pedro Sánchez xa que ERC, Junts, Bildu e o BNG se negan a acudir ás consultas do rei.
O que si que se sabe son as condicións dos independentistas cataláns: amnistía para todos os procesados polo procés e sentar as bases para unha nova consulta de autodeterminación para Cataluña.
Feijóo de novo na Zarzuela
E unha hora despois acudirá a Zarzuela o presidente do PP Alberto Núñez Feijóo, que xa tivo a súa oportunidade pero foi derrotado esta semana no Congreso. En todo caso, e a pesar dalgunhas chamadas á abstención, o PP xa adiantou que os seus 137 deputados votarán en contra da investidura de Sánchez.
Rolda do resto de partidos
Como é habitual, a lista de partidos ordenouse de menor a maior apoio obtido nas eleccións xerais. Así, a rolda abrirase ás 11:00 horas do luns co presidente de Unión do Pobo Navarro (UPN) Javier Esparza, a formación foral que logrou un escano o 23 de xullo e que xa apoiou a investidura de Alberto Núñez Feijóo.
Unha hora despois está citada a deputada de Coalición Canaria (CC) Cristina Valido, que asinou un acordo para apoiar a investidura de Feijóo aínda que non se pecha a negociar tamén co PSOE se primeiro cumpre con transferencias que considera incumpridas e se despois os socialistas asumen a chamada axenda canaria.
Ás 13 horas será a quenda do portavoz do PNV Aitor Esteban, que representa cinco deputados. Os nacionalistas vascos rexeitaron a investidura de Feijóo e só consideran falar co PSOE, aínda que ata o de agora non comezaron as súas negociacións e cren que primeiro os socialistas deberían atraer a Junts.
Yolanda Díaz acudirá pola tarde a Zarzuela
Pola tarde será a quenda da líder de Sumar, a vicepresidenta Yolanda Díaz, que acudirá a Zarzuela ás 16:30 horas en representación dos 31 deputados logrados o 23X. Sumar é unha coalición que ten deputados de oito partidos distintos (Sumar, Podemos, En Comú, EU, Compromís, Más Madrid, Més per Mallorca e Chunta Aragonesista), pero Yolanda Díaz será a única que acuda a falar co xefe do Estado, como xa fixo na primeira rolda de consultas.
Santiago Abascal será o último en ser recibido polo rei
A xornada do luns pecharase co presidente de Vox Santiago Abascal, citado en Zarzuela ás 17:30 en representación dos 33 deputados da formación. Vox apoiou a investidura de Núñez Feijóo, aínda que deslizou críticas ao PP, pero deixou claro que se opoñerá á reelección de Pedro Sánchez.