Macron rexeita a dimisión do primeiro ministro e pídelle seguir "polo momento"

Gabriel Attal presentou este luns a súa dimisión como primeiro ministro ao presidente francés Emmanuel Macron, que lle encargou que siga no posto provisionalmente para xestionar os asuntos correntes e garantir a estabilidade mentres se forma un novo Goberno saído das eleccións lexislativas.

Fontes da presidencia explicaron que Macron, que recibiu a Attal no Palacio do Elíseo a media mañá, lle pediu, unha vez que lle presentou a dimisión, que siga como primeiro ministro por agora para garantir a estabilidade do país, sen fixar ningún prazo.

As fontes sinalaron que o xefe do Estado deu as grazas a Attal por dirixir as últimas campañas electorais, primeiro a das europeas e logo a das lexislativas.

O primeiro ministro francés xa avanzara tras coñecerse onte á noite os resultados da segunda volta das lexislativas, nas que o seu grupo perdeu a maioría relativa coa que gobernara, que presentaría a dimisión pero que podería seguir en funcións "tanto tempo como o deber o esixa".

Sobre todo, tendo en conta que Francia organiza os Xogos Olímpicos de París, que se van celebrar do 26 de xullo ao 11 de agosto e representan un desafío, en particular en termos de seguridade.

Macron vai tomar un tempo para analizar os resultados electorais

Macron, polo seu lado, fixo saber tamén este domingo que ía tomar un tempo para examinar os resultados dos comicios e comprobar "a estruturación da nova Asemblea Nacional", para, a partir de aí, decidir sobre o Goberno que se poida constituír.

O xefe do Estado, que en Francia é quen nomea ao primeiro ministro aínda que logo este ten que responder perante a Asemblea Nacional, xa que a Cámara o pode tombar cunha moción de censura, asegurou que "no seu papel de garante das institucións, velará para que se respecte a decisión soberana dos franceses".

Está por ver se nesta nova fase provisional se mantén a mesma estrutura do Goberno, cos principais puntais que son o ministro do Interior Gérald Darmanin, responsable do dispositivo de seguridade nos Xogos Olímpicos, ou o de Economía e Finanzas Bruno Le Maire.

A Nova Fronte Popular proporá o nome dun primeiro ministro

Os partidos de esquerdas da Nova Fronte Popular prometeron concertarse para propoñer esta mesma semana o nome dun primeiro ministro coa intención de que sexa o elixido por Macron, co argumento de que tras os comicios de onte son o primeiro grupo da Asemblea Nacional polo número de deputados.

O NFP logrou 182 escanos dun total de 577, é dicir, moi lonxe dos 289 necesarios para a maioría absoluta, aínda que iso significa un avance significativo se se compara cos 149 que tiña na Asemblea Nacional saínte.

Nada obriga formalmente a Macron a elixir un primeiro ministro da esquerda.

O bloque macronista, que na pasada lexislativa estivo a gobernar cunha maioría relativa de 250 deputados, pasou a ser o segundo grupo parlamentario con ao redor de 168 escanos e nin sequera chegaría a eses 289 escanos se conseguise unha eventual alianza co partido da dereita convencional Os Republicanos e con outras formacións centristas, que suman outros 68 deputados.

Macron viaxa este martes a Washington para participar no cume da OTAN, que se vai prolongar ata o xoves.