Galicia xa ten 224 praias libres de tabaco
Galicia xa ten 224 praias libres de tabaco
Son dez novos areais que están nos concellos de Cabanas, Muros e Oleiros
Saúde Pública quere para o 2027 baixar do 15% de adultos fumadores
A Rede Galega de Praias sen Fume conta xa con 224 areais libres de tabaco, tras a inclusión de 10 máis.
As dez praias que se suman á rede son: A Magdalena, en Cabanas; as de Area Maior, Agrocovo, O Fogareiro, O Portiño do Maio e Reimúndez, todas elas en Muros, e as de Espiñeiro, Mera, Naval-Santa Cruz e Santa Cristina desaugadoiro do río, no municipio de Oleiros.
A directora xeral de Saúde Pública da Consellería de Sanidade, Carmen Durán, visitou este venres a praia da Magdalena para informar das novas incorporacións á Rede Galega de Praias sen Fume, segundo explica a Xunta nun comunicado.
Durán lembrou que o programa Praias sen Fume botou a andar no ano 2016, sendo Galicia a primeira comunidade autónoma que puxo en marcha un proxecto deste tipo.
Os seus obxectivos inciden na promoción dunha vida sen tabaco, a desnormalización do seu consumo na sociedade e o respecto e o coidado das praias e do medio ambiente.
