Gandeiros e Medio Rural traballan para garantir contratos que manteñan os prezos do leite

As principais demandas das organizacións leiteiras á industria para a renovación dos contratos coas granxas volveron poñerse enriba da mesa na xuntanza que esta semana tiveron con Medio Rural.

Fíxose un chamamento a que todos os axentes que participan na produción, transformación e distribución do leite manteñan unha estabilidade nos prezos e que non haxa diferenzas con outras rexións do Estado.

O leite é un sector estratéxico para Galicia, que proporciona o 42 % da produción de todo o Estado. Ante as ameazas habituais de baixadas de prezos por parte da industria, a Xunta e as organizacións agrarias fixeron balance esta semana do recente proceso de renovación dos contratos que tivo como prioridade acadar un prezo xusto do produto.

"Fomos capaces de chegar a un acordo en que a baixada en moitos casos non se produciu ou foi mínima e conseguimos que se foran alongando os contratos e ese era o obxectivo. Neste momento xa se asinaron contratos con gandeiros ata febreiro do ano que vén, algo que é innovador e positivo. Seguiremos traballando porque é un sector en que hai que estar de forma constante e continua", asegurou Xosé Baleiros, director xeral de Gandaría, Agricultura e Industrias Agroalimentarias.

A estratexia do sector lácteo aspira a que en 2025 Galicia transforme o 75 % do leite producido aquí. Nestes momentos xa supera o 70 %.

"Hoxe Galicia conta coas mellores industrias de transformación, algunha deles absolutamente innovadoras. Temos algún caso que neste momento é un exemplo de industria leiteira máis avanzada de Europa que fai produtos de última xeración a nivel de caseínas e medicamentos apropiados para a vellez, a infancia ou para deportistas", explicou Baleiros.

Desde Medio Rural aseguran que unha industria desenvolta e con garantías produtivas é o único xeito de promover a remuda xeracional do sector gandeiro.