Hamás agradece a postura "clara e audaz" de Sánchez e De Croo sobre a guerra

Hamás agradeceu este sábado a "postura clara e audaz" do presidente do Goberno de España, Pedro Sánchez, e do primeiro ministro belga, Alexander de Croo, que este venres criticaron o alto número de vítimas civís gazatís na guerra entre Israel e o grupo islamita na franxa de Gaza.

"Apreciamos a postura clara e audaz do primeiro ministro belga, Alexander de Croo, que afirmou o seu rexeitamento á destrución de Gaza e ao asasinato de civís; e do español Pedro Sánchez, que condenou as matanzas indiscriminadas do Estado ocupante contra civís na Franxa, e apuntou a posibilidade de que o seu país recoñeza unilateralmente o Estado palestino, se a Unión Europea non dá este paso", afirmou nun comunicado.

Ambos os dous mandatarios ofreceron unha conferencia de prensa no lado exipcio do cruzamento de Rafah, pouco antes da liberación dos primeiros reféns israelís, na que instaron a Hamás a entregar todos os menores, e a Israel a cumprir as súas obrigas en materia de dereito internacional.

"Chegou o momento para a comunidade internacional e para a Unión Europea de recoñecer dunha vez o Estado de Palestina", afirmou Sánchez, quen adiantou que España podería "tomar as súas propias decisións" se a UE non dá ese paso.

Hamás fixo un chamamento a "todos os países do mundo" para que se poñan "do lado da xustiza e da causa palestina", apoien "estas posturas audaces e as intensifiquen contra a ocupación", esixan a fin "da súa agresión e da guerra xenocida contra o pobo palestino" e fagan que os seus dirixentes "rendan contas polos crimes contra nenos e civís indefensos".

Sánchez e De Croo visitaron este xoves Israel. Recibidos polo primeiro ministro Benjamín Netanyahu, o presidente Isaac Herzog, e o ministro de Exteriores, Eli Cohen, percorreron o kibutz Beeri, un dos masacrados por Hamás o 7 de outubro.

Embaixadores convocados

Tras a rolda de prensa en Rafah, o Ministerio de Exteriores israelí convocou os embaixadores en Israel de España e Bélxica, Ana Sálomon Pérez e Jean-Luc Bodson, respectivamente, para unha "conversa de reprensión dura".

"Condenamos as declaracións falsas dos xefes de Goberno de España e Bélxica, as cales apoian o terrorismo", afirmou Cohen, unha condena que tamén veu do propio Netanyahu.

"Os comentarios non atribuíron a Hamás toda a responsabilidade polos crimes contra a humanidade que perpetrou: masacrar cidadáns israelís e utilizar palestinos como escudos humanos", indicou o primeiro ministro israelí.

O Ministerio israelí non revelou cando se producirá a reunión cos embaixadores de España e Bélxica, pero será previsiblemente o domingo ou o luns. En resposta, tanto España coma Bélxica convocaron os embaixadores israelís a senllas reunións.

"As acusacións son totalmente falsas e inaceptables e rexeitámolas tallantemente", asegurou o ministro de Asuntos Exteriores.

Segundo José Manuel Albares, as acusacións do Goberno de Israel "son especialmente graves" porque se dirixen contra o presidente de quenda do Consello da UE (Sánchez) e o primeiro ministro do país que vai ocupar a Presidencia a partir do 1 de xaneiro (De Croo).