Hugo Álvarez, tras renovar co Celta ata 2028: "Na miña cabeza só estaba seguir aquí"

O internacional sub-21 Hugo Álvarez asegurou este xoves, dous días despois de asinar o seu novo contrato co R. C. Celta, o cal os une ata o 30 de xuño de 2028, que na súa cabeza “sempre” estivo continuar no club celeste.

“Tanto o club como eu queriamos chegar a un acordo, persoalmente estou moi contento de estar aquí, oxalá poida ser durante moitos anos máis. A negociación foi moi fácil, o Celta foi o club que apostou por min desde pequeno e na miña cabeza só estaba seguir aquí. Se é por min, estaría vinculado ao Celta toda a miña vida”, manifestou en conferencia de prensa.

O extremo, un fixo no once celeste desde a chegada de Claudio Giráldez, descoñece se o pasado verán chegaron ofertas por el porque unicamente ten “a cabeza posta no día a día”.

Hugo Álvarez, de 21 anos, debutou en Primeira División o 25 de outubro de 2021 fronte ao Xetafe no Coliseum, onde o entón técnico celeste, Eduardo Coudet, lle deu os últimos dez minutos.

Con todo, non foi ata a pasada tempada cando se asentou no primeiro equipo, coincidindo co ascenso de Claudio Giráldez tras a destitución de Rafa Benítez. No presente campionato, Hugo Álvarez disputou 14 partidos de Liga (998 minutos), nos que marcou dous goles e repartiu unha asistencia.

“A miña vida non cambiou moito, aínda que é verdade que agora todo ten máis relevancia porque nos ve moita máis xente”, comentou o extremo, quen dixo sentirse “máis cómodo” xogando pola banda esquerda a pesar de que o seu adestrador véno alternando nos dous costados.

O canteirán non quixo marcarse un obxectivo a longo prazo, “imos partido a partido, o equipo está a traballar moi ben e nestes cincos últimos partidos do ano queremos sumar o maior número de puntos posible”, aínda que admitiu que a domicilio teñen que dar “un plus”.

“Fóra de casa as cousas non nos están saíndo, pero se seguimos nesta liña de traballo sabemos que os resultados chegarán”, destacou Hugo Álvarez.