Israel pecha as fronteiras terrestres con Xordania tras un ataque que ocasionou tres mortos

As autoridades israelís decidiron pechar todos os pasos fronteirizos con Xordania tras o ataque que este domingo cobrou a vida de tres cidadáns israelís no cruzamento de Allenby, na Cisxordania ocupada.

Todos os pasos por terra cara ao país veciño foron clausurados ata novo aviso. As tres vítimas eran operadores de guindastre que se atopaban traballando no momento do ataque, aínda que algúns medios, como a CNN ou o israelí Haaretz, dixeron que eran gardas de seguridade.

O ataque produciuse pouco antes da 10:00 hora local (07:00 GMT), cando un home que conducía un camión desde Xordania abriu fogo contra as forzas de seguridade no cruzamento fronteirizo, o único cara a Xordania habilitado para palestinos.

O atacante, cuxa identidade se descoñece, foi abatido. A Xihad Islámica Palestina celebrou a "heroica operación" nun comunicado, mentres que as Brigadas ao Qasam, o brazo armado de Hamás, lembrou un discurso do seu portavoz, Abu Obeida, chamando a Xordania a escalar a súa "resistencia" contra Israel.

"Un terrorista achegouse á zona da ponte Allenby (ao norte do Mar Morto) desde Xordania nun camión. Baixou do camión e abriu fogo contra as forzas de seguridade israelís que operaban na ponte", indicou esta mañá o Exército israelí nun comunicado.

Israel utiliza sempre o termo "terrorista" cando un ataque é perpetrado por unha persoa de orixe palestina por motivos nacionalistas. O servizo de emerxencias israelí Magen David Adom (MDA) recibiu unha chamada polo ataque á 09:55 hora local (06:55 GMT) e os seus paramédicos acudiron ao lugar.

Os sanitarios, con axuda de médicos militares, "declararon a morte de tres homes, de aproximadamente 50 anos, por feridas de bala", indicou o MDA nun comunicado. O Exército precisou que os tres mortos eran civís israelís. Varias tropas militares foron despregadas ao lugar dos feitos para "descartar a sospeita de que o camión estivese cargado de explosivos", asegurou o Exército.

A Cisxordania ocupada vive a súa maior espiral de violencia, desde a Segunda Intifada (2000-05).

Canto ás negociacións de paz, William Burns, director da CIA e xefe do equipo negociador dos E.U.A. para un cesamento do fogo en Gaza, asegurou este sábado que nos próximos días presentarase unha nova proposta. “Faremos esta proposta máis detallada, espero que nos próximos días, e logo xa veremos”, declarou Burns.

Hamás consideraba que non era preciso cambiar o documento. Pero Israel insiste en que non se vai retirar do corredor Filadelfia, na fronteira sur entre Gaza e Exipto.