Jonathan Giráldez engade a Champions ao seu palmarés co Barcelona

O preparador vigués Jonathan Giráldez proclamouse campión da Champions feminina no seu segundo intento co Fútbol Club Barcelona. Ademais non foi un título calquera senón que chegou despois dunha remonta espectacular diante do Wolfsburgo. Tamén celebrou o triunfo a galega Nuria Rábano, malia que non dispuxo de minutos nunha das finais máis espectaculares dos últimos tempos.

Adiantouse o equipo alemán cun 0-2 na primeira parte (Payor e Pop). Empatou cun dobrete Patri Guijarro ao pouco de comezar a segunda parte. E no 70, Rolfo facía o definitivo 3-2.