Kevin McCarthy, elixido presidente da cámara de representantes dos EUA
Kevin McCarthy, elixido presidente da cámara de representantes dos EUA
O líder da maioría republicana logra o posto tras 15 votacións e despois de acceder ás esixencias da ala máis radical do seu partido
A abstención de seis republicanos rebeldes outorgoulle a vitoria a McCarthy tras o caos vivido no Congreso estadounidense. Foron necesarias 15 votacións nos últimos días para que o líder da maioría republicana accedera ao posto.
O novo presidente da cámara de representantes dos Estados Unidos, Kevin McCarthy, mostrouse este sábado desafiante ante os demócratas e o mandatario do país, Joe Biden, nun discurso durante a apertura da 118 lexislatura do Congreso.
A cámara baixa dos Estados Unidos iniciou a madrugada deste sábado unha nova etapa despois da elección de McCarthy como o seu presidente, tras quince votacións ao longo de catro xornadas polo boicot dun grupo de republicanos ultras, nunha situación inédita nun século.
McCarthy comezou o seu discurso chanceando cun irónico "isto foi fácil, eh?", en referencia ao arduo da súa elección, e acto seguido advertiu de que "xa é hora" de supervisar e proporcionar "un equilibrio" ás políticas de Biden, que minutos antes lle tendía a man para colaborar nun comunicado.
"Non hai nada máis importante que facer posible que as familias estadounidenses vivan e gocen das vidas que merecen e, por iso, comprometémonos a deter o gasto inútil de Washington para baixar o prezo da comida, a gasolina, a vivenda e parar o aumento da débeda nacional", enumerou McCarthy.
Adiantou que unha das súas prioridades será a inmigración e que ten intención de aprobar iniciativas lexislativas para abordar retos urxentes como "a fronteira sur aberta", as políticas enerxéticas ou "o adoutrinamento progre nos colexios".
Anticipou que unha das primeiras audiencias lexislativas que organizará será sobre a situación fronteiriza: "Debemos asegurar a fronteira, acabouse facer caso omiso dunha crise de seguridade e soberanía".
Así mesmo, McCarthy dixo que tratarán na cámara dous "desafíos a longo prazo": a débeda e "o ascenso do Partido Comunista Chinés".
McCarthy fixo unha alusión velada ao comité lexislativo promovido polos demócratas sen o apoio dos republicanos que investigou o asalto ao Capitolio de hai dous anos e o papel desempeñado polo expresidente Donald Trump.
"Non máis investigacións dunha soa parte, as ideas contrapostas probaranse ante o público para que as mellores gañen", advertiu.
"Espero que unha cousa quedase clara despois desta semana: Nunca abandono", afirmou McCarthy tras a exposición do seu programa.
Os lexisladores, incluído o propio McCarthy, xuraron os seus cargos esta noite despois de días de caos político, aínda que non aprobaron as regras que rexerán o funcionamento da cámara baixa, xa que decidiron suspender a sesión ata o luns ás 17:00 hora local (22:00 GMT).
