Lobato non dimite e denuncia un "linchamento" por parte de dirixentes do seu partido

O secretario xeral do PSOE-M Juan Lobato aférrase ao seu cargo despois do malestar que causou no seu partido o rexistro nunha notaría dunha conversa privada coa xefa de gabinete do ministro Óscar López.

Nela, Pilar Sánchez Acera reenvioulle o email en que presuntamente confesaba delitos fiscais Alberto González Amador, a parella da presidenta da Comunidade de Madrid Isabel Díaz Ayuso, para que o dirixente do PSM a utilizase na Asemblea de Madrid, cousa que non fixo.

Con este movemento, Juan Lobato desatende o sector crítico, que este luns xa pedía a súa cabeza. Aseguraban a Europa Press que non podía chegar no cargo ao Congreso Federal desta fin de semana en Sevilla porque rompera "a confianza" da federación e fora en contra do seu propio partido.

Juan Lobato: "Estou preocupado polo linchamento por parte de dirixentes do meu partido"

O secretario xeral dos socialistas madrileños denunciou este martes o "linchamento" que sufriu nas últimas horas por parte dalgúns compañeiros so seu partido e insistiu en que no PSOE hai democracia interna. "Estou preocupado polo linchamento por parte de dirixentes do meu partido", indicou nunha comparecencia ante os medios de comunicación sen preguntas ofrecida na Asemblea de Madrid e convocada de forma urxente polo seu equipo de prensa.

Juan Lobato explicou que non considera a posibilidade de que fose falso o que se lle dixo, que a orixe da documentación foran os medios de comunicación. "Isto sería bastante grave".

"Se a orixe do documento fose diferente do que se me dixo, isto suporía que se me mentiu e sería un intento de que fora eu quen fixese público ese documento con orixe irregular e coas consecuencias legais que iso suporía para min e para o PSM".

Ante os medios de comunicación, o secretario xeral do Partido Socialista de Madrid enviou tamén unha mensaxe ao Partido Popular. Aos populares dilles: "O PSOE non é unha seita nin unha axencia de colocación de amigos aos que protexer; é un partido democrático, con 145 anos de historia, de integridade, de militantes e de referentes políticos exemplares, e vaino seguir sendo".

Patxi López evita falar de Lobato e confía en que "a xustiza chegue ata o final": "Empezamos a estar moi fartos da antipolítica"

O PSOE non quixo entrar a avaliar as declaracións do líder do partido en Madrid Juan Lobato en que denunciou o "linchamento" por parte dalgúns compañeiros de formación. Fontes socialistas lembraron a EFE que a dirección nacional do PSOE cesará este próximo sábado e que é o PSOE de Madrid quen debe xestionar a situación.

Nos corredores do Congreso, o portavoz do PSOE Patxi López evitou falar de Lobato e asegurou: "Non debemos perder a perspectiva: que alguén cometeu un delito".

López confía en que a xustiza chegue ata o final e determine se hai responsabilidades nalgúns políticos. "Empezamos a estar moi fartos da antipolítica".

No Senado, a vicepresidenta primeira do Goberno María Jesús Montero evitou este martes falar de Juan Lobato e pediu non desviar a atención "do importante": que o xefe de gabinete da presidenta madrileña "mentiu á mantenta sobre a situación procesual do noivo" de Isabel Díaz Ayuso, Alberto Gómez Amador.

Tellado ataca o PSOE por sinalar a porta de saída a Lobato: "Non participar dos delitos é considerado unha traizón"

O portavoz do PP no Congreso, Miguel Tellado, acusou o PSOE de sinalar a porta de saída ao líder socialista de Madrid, Juan Lobato, por non querer intervir nun delito: "Non participar dos delitos é considerado unha traizón".

Tellado, nunha conferencia de prensa no Congreso, tamén arremeteu contra Lobato ao sinalar que se era coñecedor destes delitos "tiña que acudir á xustiza e non a un notario para protexerse".

Tamén a secretaria xeral do PP Cuca Gamarra considera que se está perseguindo o líder do PSOE de Madrid para que dimita porque non participou na persecución que se deseñou desde Moncloa contra o adversario político: "Estamos ante a purga do único que sabemos que non colaborou".

A secretaria xeral do PP asegurou que espera que Lobato na súa declaración ante o Tribunal Supremo o vindeiro venres "diga toda a verdade e lle conte ao xuíz como foi esa pinza na cal hoxe se atopa Pedro Sánchez entre o fiscal xeral do Estado e Juan Lobato".