Macron di que a reforma das pensións era precisa e propón un novo "pacto social"

O presidente francés Emmanuel Macron afirmou este luns que a reforma das pensións "era necesaria" para evitar a acumulación de déficit e propuxo un novo "pacto social" para mellorar as condicións dos traballadores.

Nunha intervención televisada no medio da crise política pola aprobación desa reforma, Macron insistiu en que os cambios aprobados polo seu Goberno eran a única resposta posible ante o aumento progresivo do número de xubilados e da esperanza de vida.

Macron admitiu igualmente que hai "enfado" nun contexto de empregos que non permiten facer fronte aos crecentes custos de vida.

Esa "demanda de xustiza social e de renovación da vida democrática" hai que escoitala, dixo, e sinalou que "a resposta non pode estar no inmobilismo nin no extremismo".

Por iso propuxo o novo "pacto social" xunto con empresarios e sindicatos, para discutir "sen límites nin tabús" unha serie de "temas esenciais" entre os que mencionou os salarios, a mellora das condicións de traballo e a distribución da riqueza.

"A porta sempre estará aberta", sinalou o xefe de Estado, a pesar de que nos últimos tres meses o Elíseo rexeitou manter a reunión que lle solicitaban os sindicatos.

No seu esperado discurso, que durou apenas 13 minutos, Macron fixo tamén unha alegación en favor da conquista dunha "independencia" francesa que garanta o futuro do país á marxe de forzas externas.

Eses obxectivos só se conseguirán, dixo, a través do traballo e a reindustrialización, que permitirá tamén crear empregos mellor pagos.

O presidente anunciou grandes áreas de traballo para o seu Goberno, empezando cunha batería de accións de planificación ecolóxica antes do verán para facer fronte aos desafíos climáticos.

Macron mencionou tamén a necesidade de traballar en materia de xustiza con medidas para mellorar os tribunais, para loitar contra a delincuencia e a inmigración ilegal.

Tamén prometeu iniciativas para asegurar que todo o mundo "teña a certeza de que os nosos fillos vivirán mellor", con énfase en materias como a sanidade e a educación.

Asemade á intervención de Macron, había centos de cazoladas convocadas por toda Francia en protesta contra a reforma das pensións.

As primeiras reaccións dos sindicatos tampouco se fixeron esperar e, en declaracións á canle televisiva BFM, o líder sindical Laurent Berger, da maioritaria CFDT, aseverou que o que lamente agora Macron non "vai cambiar nada".