Francia mantén a Macron no Elisio malia o histórico avance de Le Pen

O presidente francés Emmanuel Macron foi reelixido co 58,54 % dos votos, mentres que a súa rival Marine Le Pen quedou cun 41,46 %, de acordo cos resultados provisionais publicados este luns polo Ministerio do Interior unha vez escrutado o 100 %.

A diferenza entre os dous finalistas na segunda volta das presidenciais foi de 5,5 millóns de sufraxios, que significan pouco máis da metade dos 10,1 millóns que os separaba no duelo que ambos xa mantiveran nas eleccións de 2017.

Un dos elementos destacados da xornada electoral foi a abstención do 28,01 %, a máis elevada nunha segunda volta das presidenciais desde 1969. Tamén o alto número de votos nulos (2,25 % dos recolleitos nas urnas) e sobre todo en branco (6,35 %).

En total, máis dun terzo do corpo electoral non se pronunciou, por acción ou por omisión, nin por Macron nin por Le Pen, que ao mesmo tempo obtivo os mellores resultados da historia da ultradereita en Francia.

O Consello Constitucional proclamará oficialmente os resultados o vindeiro mércores, unha vez proceda á súa verificación; iso abrirá o camiño para un novo mandato de Macron, que formalmente empezará como moi tarde o 13 de maio coa cerimonia de investidura.

Nos próximos días debe presentar a dimisión o Goberno do primeiro ministro Jean Castex, que o presidente debe substituír, aínda que teoricamente podería verse obrigado a cambialo de novo en función dos resultados dos comicios lexislativos que se celebrarán tamén a dúas voltas o 12 e o 19 de xuño.

No campo de Marte, fronte á torre Eiffel, co Himno da alegría e acompañado pola súa esposa e o Goberno en pleno. Macron comezou o discurso agradecéndolles aos franceses que lle renovaran a confianza despois de cinco anos de dificultades.

Fixo referencia a ese enfado que levou a moitos a votar pola extrema dereita e promete dar unha resposta. Macron tamén se comprometeu a escoitar o silencio dos abstencionistas. Di que será o presidente de todos.

Macron arrasou nas grandes cidades, entre os electores con máis renda e entre os xubilados. Pero segue sen convencer nas rexións máis deprimidas, onde quedou moi por detrás de Le Pen, que superou por primera vez os 13 millóns de votos e ve o resultado como unha vitoria.

A líder ultradereitista promete dar a batalla nas eleccións lexislativas de xuño, para conseguir un contrapoder a Macron. 

Macron convértese no primeiro presidente francés reelixido dende 2002. E xa non poderá presentarse ás próximas eleccións pola reforma constitucional, que limita a dous o número de mandatos consecutivos.

Alivio en Europa

O presidente do Consello, Charles Michel, di que poden contar con Francia cinco anos máis. Dende España, Pedro Sánchez tamén felicitou a Macron. Di que gaña a democracia e Europa. E o presidente do PP, Núñez Feijóo, celebra que Francia decidira seguir polo camiño da estabilidade e da moderación.

As lexislativas, próximo reto

Eses novos comicios terán lugar o 12 e 19 de xuño e o seu resultado determinará a marxe do Executivo á hora de efectuar as súas reformas. A actual maioría está composta polo partido de Macron, con 267 dos 577 deputados, polo centrista MoDem (57) e polo grupo Agir Ensemble (22).

O traballo de recomposición e reconciliación non se concedeu unha tregua porque este novo quinquenio pretende non ser un de continuidade. O ministro de Economía e Finanzas, Bruno Le Maire, afirmou que debe haber un cambio na forma de goberno para que a cidadanía se exprese con máis frecuencia, tanto con referendos como con mecanismos "máis simples", como unha emenda cidadá que necesitaría 100.000 firmas para elevala ao Parlamento.

Pero esas boas intencións poderían chocar de novo coa vontade e necesidade de reforma. Le Maire non puido garantir na emisora France Info que non recorrerán ao artigo constitucional 49.3, que exime do voto parlamentario, para aprobar a reforma das pensións, que atrasaría dos 62 aos 65 anos a idade da xubilación.

Julien Odoul, portavoz da Agrupación Nacional (o partido de Le Pen), cre que a súa formación é xa "a principal da oposición". "O que queremos e fixemos desde hai meses é abrir a Agrupación Nacional a todos aqueles que aman Francia e queren simplemente que as nosas ideas e valores gañen. Haberá candidatos da Agrupación e outros apoiados por ela, pero nós somos o polo principal de oposición", dixo.

O esquerdista Jean-Luc Mélenchon, terceiro na primeira rolda do 10 de abril co 21,95 % dos sufraxios, mobilizouse xa á súa vez para formar unha coalición parlamentaria xunto a ecoloxistas, comunistas e anticapitalistas.

E os conservadores Os Republicanos, derrotados na primeira volta co 4,78 % dos votos, confían na súa implantación nacional para reequilibrar a relación de forzas ata 2027: "A diferenza da maioría presidencial, temos deputados asentados, que coñecen os seus territorios. Comeza unha nova campaña", dixo este domingo o seu líder, Christian Jacob.