Le Pen, fóra das presidenciais de 2027 tras ser inhabilitada por desvío de fondos

A líder da extrema dereita francesa, Marine le Pen, foi condenada este luns a catro anos de prisión, dous firmes que pode cumprir con brazalete electrónico, 100.000 euros de multa e a cinco anos de inhabilitación con aplicación inmediata polo desvío de fondos do Parlamento Europeo entre 2004 e 2016 en beneficio do seu partido.

A pena pon en xaque o seu futuro político e a súa intención de presentarse ás eleccións presidenciais de 2027, para as que aparecía como a principal favorita das sondaxes.

Le Pen abandonou o Palacio de Xustiza tras coñecer a inhabilitación inmediata, sen esperar a que o tribunal anunciase todos os detalles da súa pena. Pouco despois chegou á sede do seu partido sen realizar declaracións á nube de xornalistas que a esperaban.

Minutos máis tarde chegou o seu número dous, Jordan Bardella, que anulou o seu desprazamento a Estrasburgo para o pleno do Parlamento Europeo, e tamén sen facer declaracións.

O que está considerado como o seu delfín político publicou unha mensaxe nas redes sociais no que considerou que con esa sentenza "a democracia francesa queda executada".

Oito antigos eurodeputados foron condenados tamén a prisión e inhabilitación

Os outros oito antigos eurodeputados do seu partido recibiron tamén a distintas penas de prisión, multas e de inhabilitación.

Unha das figuras máis destacadas do partido, Louis Aliot, alcalde da cidade de Perpiñán, a de maior tamaño gobernada pola extrema dereita, foi condenado a tres anos de inhabilitación pero sen aplicación inmediata debido á súa condición de electo a nivel local.

A sentenza considera que Le Pen herdou en 2009 o "papel central" do seu pai como instigador do sistema de financiamento do partido co diñeiro dos asistentes parlamentarios da Eurocámara e exerceuno "autoridade e determinación", polo que lle impuxo a maior condena.

Aínda que a parte que máis doeu foi a aplicación inmediata, con carácter preventivo, da inhabilitación, porque compromete as súas opcións de presentarse por cuarta vez ao Elíseo.

A presidenta do tribunal xustificouno por "a gravidade dos feitos", pola necesidade de probidade da vida pública e porque o sistema de financiamento ilícito do partido atentou contra a neutralidade democrática, ao permitirlle concorrer en condicións vantaxosas ás eleccións. 

Rusia interpreta a sentenza como unha "violación das normas democráticas" por parte das capitais europeas. "Cada vez son máis as capitais europeas que seguen o camiño de pisotear as normas democráticas", sinalou o portavoz do Kremlim, Dmitri Peskov. Con todo, recalcou que "por suposto" Rusia non quere interferir nos asuntos internos de Francia.

Le Pen cualifica de política a súa condena e insiste en optar á presidencia en 2027

A líder da extrema dereita francesa, Marine Le Pen, cualificou como "política" a sentenza.

Le Pen fixo estas declaracións nunha entrevista na canle de televisión TF1, a primeira tras coñecer a condena.

Segundo a política, de 56 anos, o obxectivo da sentenza é "impedir que sexa elixida presidenta en 2027".

A líder de Rassemblement National recoñeceu que a súa candidatura está en risco, aínda que considera que aínda queda “un pequeno camiño”.
"Vou pedir que a apelación me permita presentar candidatura", declarou.
Tamén pediu celeridade á xustiza para resolver o recurso antes da cita electoral.

A pesar da inhabilitación, Le Pen asegurou que non se considera afastada da vida política.
"Non vou deixar que me eliminen facilmente", afirmou.
Engadiu que seguirá co seu “combate político” e que o apoio electoral segue intacto.

Sobre o seu sucesor político, o eurodeputado Jordan Bardella, de 29 anos, Le Pen sinalou que "é unha aposta formidable".
Con todo, expresou o seu desexo de non ter que recorrer a el antes do necesario.

"Non estou desmoralizada, estou escandalizada. Indignada. Pero eses sentimentos poden ser un motor máis para o combate que levo a cabo polos franceses", concluíu.