Miles de persoas maniféstanse en Francia contra o nomeamento de Barnier

Miles de manifestantes, convocados por partidos, sindicatos e organizacións de esquerdas, saíron este sábado á rúa en Francia para protestar polo nomeamento como primeiro ministro do conservador Michel Barnier.

O fundador da Francia Insubmisa (LFI), Jean-Luc Mélenchon, foi un dos líderes políticos presentes na marcha de París, que comezou na praza da Bastilla, onde asegurou esta será "unha batalla e unha loita que durará tempo".

Mélenchon confirmou a presentación dunha moción de censura contra Barnier, que se comprometeron a votar todos os partidos de esquerda, en canto empecen as sesións no Parlamento, algo que podería non ocorrer ata outubro.

Oposición dura

Preto de 150 manifestacións organizáronse en toda Francia, dentro dunha acción de oposición dura á que se engadirá esa moción de censura e un procedemento parlamentario para a destitución de Macron promovido pola LFI, pero non por outros partidos de esquerda.

A coalición dos partidos de esquerda Nova Fronte Popular (NFP), que obtivo 193 deputados dun total de 577 nas eleccións lexislativas convocadas por Macron, reclamáballe ao presidente poder formar goberno ao ser o primeiro grupo na Asemblea Nacional. 

Porén, Macron optou por Barnier, membro dos Republicanos (LR), o partido da dereita tradicional, que quedou co 6 % dos votos e 47 escanos, pero que conta co apoio implícito da maioría presidencial saínte (166 deputados).

Bardella: "Non se pode facer nada sen nós"

Jordan Bardella, o presidente da Agrupación Nacional (RN) insistiu en que o seu é "o primeiro partido de Francia" en votos e deputados, polo que "non se pode facer nada contra nós ou sen a nosa aprobación ou censura".

A extrema dereita de Marine Le Pen foi o bloque máis votado (un 37 %, fronte ao 28 % da esquerda), aínda que quedou con 142 escanos.

Bardella, que fixo un desprazamento á cidade de Châlons en Champagne, tamén avisou de que xulgarán a Barnier "polos seus actos" e felicitouse de "impedir que a extrema esquerda se faga co poder".

"Baixo a tutela" da extrema dereita

En resposta a esas palabras, o primeiro secretario do Partido Socialista (PS), que non se sumou ás protestas na rúa contra Barnier, acusou a Macrón na súa conta de X de poñerse "baixo a tutela" da extrema dereita ao nomear ese primeiro ministro.

"Macron e os seus amigos poderían optar por non censurar o NFP, deixalo gobernar aceptando compromisos debido a que non temos maioría absoluta", razoou Faure.

O líder socialista enfróntase no seu propio partido ás críticas dalgúns baróns que se queixan de que a NFP adoptou unha posición de peche cara ao macronismo para buscar un Goberno de compromiso, e que o resultado foi un primeiro ministro de dereitas.

Nesa liña está o alcalde de Ruán, Nicolas Mayer-Rossignol, que este sábado sinalou na emisora France Info que "a forza de querer unha esquerda pura, temos unha dereita máis dura".

Tamén se pronunciaron de xeito similar nos últimos días outros dirixentes socialistas, como a alcaldesa de París, Anne Hidalgo, ou a presidenta da rexión de Occitania, Carole Delga.