Miles de persoas maniféstanse en Galicia polos dereitos das mulleres para conmemorar o 8-M

Nas principais cidades galegas, este sábado, miles de persoas manifestáronse para conmemorar o 8 de marzo, o Día Internacional da Muller desde que foi declarado pola ONU en 1977, aínda que xa comezara a celebrase dous anos antes. É un día de reivindicación dos dereitos das mulleres, da súa plena equiparación salarial cos homes e contra o machismo. 

Malia o temporal de choiva e vento que azouta hoxe Galicia, as rúas vestíronme de morado e de pancartas. A manifestación máis numerosa tivo lugar en Vigo este sábado pola tarde. Foi a manifestación convocada polo colectivo Resposta feminista e á que se sumaron outras organizacións sociais, partidos políticos e sindicatos, a pesar de que se organizaron outras dúas marchas na cidade.

No medio dunha intensa choiva e vento, miles de persoas, moitas delas con impermeables morados, saíron da  praza de España, encabezadas por unha pancarta do colectivo organizador na que se lía: "O feminismo muda a historia. Sen loita non hai futuro"

Priscila Retamozo, voceira de Resposta feminista considerou "moi importante" que, aínda que o tempo non axude, "as mulleres esteamos na rúa aquí en Vigo, coma no resto do mundo, falando dos nosos dereitos".

Respecto ás principais reivindicacións da manifestación deste ano, explicou que o foco está nas mulleres emigrantes, a centralidade dos coidados, o apoio que necesita o deporte feminino, "a necesidade de que a vergoña cambie de bando", a abolición da prostitución, a pornografía e "moitas outras cousas que ten que ver coas violencias que atravesan o noso día a día".

En canto ao avance da ultradereita e o seu discurso machista, Retamozo dixo que "hai que facer moita pedagoxía e explicar que cando as mulleres avanzan ningún home retrocede".

"Aquí está, aquí se ve, o feminismo galego en pé", foi unha das frases máis coreadas polos manifestantes, entre os que había moitas mulleres novas, pero tamén de todas as idades e bastantes homes.

Unha marea morada de mulleres saíron da praza 8 de Marzo nun ambiente festivo con música e batucada en Santiago

En Santiago, a pesar das previsións, a choiva respectou o inicio da manifestación e unha marea morada de mulleres saíron da praza 8 de Marzo nun ambiente festivo con música e batucada.

Na marcha, que finalizou na praza do Obradoiro coa lectura dun manifesto, ademais de lazos morados e carteis coa imaxe da poetisa Rosalía de Castro tamén se viron bandeiras palestinas.

Á manifestación compostelá asistiu a líder do BNG, Ana Pontón, acompañada da alcaldesa de Santiago de Compostela, Goretti Sanmartín, e antes de arrincar a marcha fixo fincapé na importancia do 8 de marzo para que as mulleres saian á rúa para seguir “reivindicando os nosos dereitos” e deixar claro que “queremos ser libres e iguais”.

Tamén o PSOE galego quixo deixar claro o seu compromiso coa igualdade e puxo fin ao Congreso do PSdeG a media tarde para que a militancia, encabezada polo líder do partido, José Ramón Gómez Besteiro, asistise ás convocatorias convocadas polas plataformas feministas.

 

Miles de persoas saíron ás rúas de todo España en defenda dos dereitos das mulleres

A celebración do 8-M estivo marcada, por cuarto ano consecutivo pola división do colectivo feminista. O feminismo acode dividido pola lei trans e polas diferenzas de opinión en canto á abolición da prostitución.  Na tarde deste domingo,  a manifestación do Movemento Feminista de Madrid, a segunda convocada hoxe na capital, percorreu o centro da cidade baixo o lema "Mulleres en loita contra o machismo global". A marea violeta tamén percorreu outras cidades coma Barcelona, Bilbao, Sevilla ou Zaragoza...