Moeche é un dos poucos concellos sen casos activos en Galicia

Malia non ter ningún caso activo de covid, os veciños de Moeche non son alleos ás medidas sanitarias que hai que ter. Tamén din que é unha cuestión de sorte nun concello con poboación moi dispersa e con pouco máis de mil habitantes. Aseguran que seguirán mantendo as precaucións mentres que a pandemia continúe.

 A farmacia, o banco, o salón de peiteados ou o supermercado consomen o tempo dos que non están a traballar. Entre a veciñanza, a máscara está sempre presente, dentro ou fóra dos establecementos. Seguen as medidas de protección, sabedores de que a poboación do concello está envellecida e quen máis ou quen menos ten algún maior na casa que precisa de protección.  

"Eu creo que é sorte agora mesmo, porque estamos rodeados e non só facemos vida aquí, senón que traballamos en toda a comarca. E tamén cumprir coas medidas, porque ao ser un sitio pequeno intentas sempre que aos teus veciños non lles pase nada", asegura unha veciña.

"Hai pouca xente, e o que máis e o que menos respecta e imos tirando", di outra.

"Respéctanse máis a normas, tamén hai máis separación e nas aldeas somos máis precavidos", afirma un veciño.

Os concellos lindeiros, con Valdoviño á cabeza con 60 novos casos de covid e un índice de máis de 250 nos últimos sete días, rodean Moeche, que xa leva toda a pandemia mantendo uns índices dos máis baixos de toda Galicia.