Monteagudo, novo presidente da RAG, reclama un "pacto político e social" polo galego

O novo presidente da Real Academia Galega, Henrique Monteagudo, reivindicou este venres un "pacto social e político" pola lingua galega para frear o descenso de falantes. O pleno da Academia Galega proclamou a Monteagudo (Muros, 1959) novo presidente con 23 votos a favor e 2 en branco, tras os oito anos de Víctor Fernández Freixanes, quen avalou a súa candidatura, entre outros.

O catedrático de Filoloxía Galega na Universidade de Santiago de Compostela estará acompañado por Ana Boullón Agrelo como secretaria, María López-Sández na tesourería, María Dolores Sánchez Palomino como arquiveira bibliotecaria e Lourenzo Fernández Prieto como vicesecretario.

"Non nos cansaremos de insistir na necesidade do pacto político e social pola lingua galega, que agora é urxencia. Ao mesmo tempo, buscaremos novas formas de exercer a nosa responsabilidade na defensa da lingua, sempre co obxectivo de facela máis eficaz", proclamou Monteagudo.

Nese sentido, apelou a "todas as forzas políticas", en especial ao "partido que ten a maioría no Goberno", o Partido Popular, porque cre que este pacto apela a "cuestións que son básicas da supervivencia da lingua e cuestións que son básicas de identidade como país" e trátase de "elementos fundamentais que deberían estar por riba da loita partidista" .

O seu equipo é novo en labores de goberno, aínda que el xa tivo cargos nas anteriores directivas, polo que vincula o actual proxecto con "continuidade e novo impulso". Dentro desta "renovación" a Academia continúa co seu "capital simbólico", pois carece doutros recursos, que se traduce en "ideas e coñecemento" que buscan "medidas a favor do galego" e expón novas maneiras de abordar o problema do descenso de falantes.

Nese sentido, mostrouse crítico coas actuais políticas que "demostraron a súa ineficacia cando non o seu carácter lesivo", polo que proclamou que "fan falta novas ideas e novos impulsos para o idioma". Para iso propón "unha Academia moi en contacto coa sociedade" que sirva para coidar ese "tesouro de todos e de todas" que é o idioma.