Atopan unha rata de cinco quilos nunha horta de Vigo

Uns veciños de Cabral, en Vigo, que traballando na horta toparon unha rata de cinco quilos. Ao parecer trátase dunha especie invasora chegada a Europa desde América do Sur, o coipú ou rata londra.

Criábanas en granxas peleteiras do sur de Francia e de alí cruzaron a España.Agora convertéronse en praga no País Vasco, Navarra e Cataluña. Son moi daniñas para as colleitas e é díficil acabar con elas, xa que se reproducen a gran velocidade. 

"Todo apunta a que foi un escape ou liberación intencionada por parte de alguén que o tiña ou que o trouxo. Non parece probable que chegara ata aquí de xeito natural desde as poboacións que están establecidas no País Vasco ou Cantabria. Entendemos que, o que debería facerse, é un seguimento na zona buscando rastros a ver se é o único exemplar ou hai máis dun e, nese caso, intentar capturalo e erradicalo do medio natural", di Serafín González, investigador científico do CSIC e presidente da Sociedade Galega de Historia Natural.