Esnaquizan o mobiliario do miradoiro das Canteiras, en Noalla
Romperon bancos, de pedra e de madeira, mesas e o valado de protección
A comunidade de Montes, propietaria do recinto, pide roldas policiais para disuadir os vándalos
En Sanxenxo, os vándalos esnaquizaron as instalacións do miradoiro das Canteiras, no alto de Noalla. Romperon bancos, mesas, o valado de protección..., e tamén lles romperon os ánimos.
"Non estamos desgustados. Estamos desgustadísimos porque isto é un acto de vandalismo. Principalmente foron os bancos e os barrotes que unen os postes para que a xente ou un neno non vaia abaixo. Están ancorados con topes de aceiro inoxidable, tiveron que darlle co pé ou algo forte", explica Roberto Garrido, o presidente da comunidade de montes de Noalla.
Non foi un accidente nin cousa de rapaces. Fai falta intención e forza.
"A violencia coa que tiveron que actuar para romper a pedra e para rebentar isto porque isto non se fai cun empurrón. Isto hai que empregar forza bruta", engade Miguel, un veciño da zona.
Os restos que hai polo chan confirman que aquí se celebrou botellón. En plena festa, non se lles ocorreu mellor cousa que subir un banco enriba dun penedo, co que iso supón.
"Un banco de madeira que lle custou o seu traballo levalo aí ao alto, que está aí colocado e pode haber unha desgraza porque esvaran ou caen e supón un problema para a comunidade e para a seguridade. Agora outra xente que nos visita dálle gusto subir e estar aí sentados porque ten un encanto pero é un problema porque coa altura que ten pode haber un accidente mortal", advirte Garrido.
O miradoiro das Canteiras é un lugar privilexiado, con vistas sobre A Lanzada e Ons..., a xoia da coroa de Noalla e o primeiro proxecto da comunidade de montes. De aí a desolación.
"Todas as fins de semana ves xente paseando por aquí, coas vistas que hai... falas de Noalla e ben falas da Lanzada ou do miradoiro das Canteiras. Se non se respecta o pouco que hai, Noalla xa non terá nada", lamenta Miguel
Calculan que a broma vai rondar os 4.000 euros, pero o peor é que lles preocupa que siga pasando. Por iso, van pedir roldas nocturnas de Policía Local e Garda Civil para evitar que volva pasar.
