Morre David Lynch, pai da serie 'Twin Peaks'

O director de cine David Lynch, faleceu este xoves aos 78 anos. "Hai un grande oco no mundo agora que xa non está connosco", anunciou a súa familia nunha mensaxe publicada nas redes sociais. Pero, como el diría: 'Mantén a vista no donut e non no buraco'", lese na páxina de Facebook do excéntrico cineasta.

Lynch anunciou o pasado agosto que sufría de enfisema pulmonar. A enfermidade impedíalle saír de casa e, polo tanto, dirixir películas en persoa.

O cineasta nado en Missoula, no estado de Montana, foi catro veces nomeado aos premios da Academia de Hollywood por 'The Elephant Man' (1980), 'Blue Velvet' (1986) e 'Mulholland Drive' (2001), pero a única figura que obtivo foi honorífica e recibiuna en 2019.

Comezou a súa carreira nos anos sesenta e a súa primeira película, 'Eraserhead', converteuse nun clásico de cinema experimental que seguía a historia de Henry Spencer, un home que vive nun mundo industrial e escuro e que se ve obrigado a coidar ao seu fillo, unha criatura deformada.

O éxito comezou con 'The Elephant Man', baseada na verdadeira historia de Joseph Merrick, un home británico do século XIX que sufriu de severas deformidades físicas, que lle valeu o seu primeiro nomeamento ao Oscar.

Lynch tamén adaptou a obra de Frank Herbert 'Dune' en 1984, cuxo éxito non foi o esperado, pero dous anos máis tarde lanzaría 'Blue Velvet', unha das obras máis importantes na súa traxectoria.

O director tamén foi responsable de 'Twin Peaks', unha serie innovadora no seu estilo narrativo que rompeu coa estrutura convencional de episodios autoconclusivos.