Morre en México o último rei do mariachi, Vicente Fernández

O artista mexicano Vicente Fernández, de 81 anos, levaba internado máis de cinco meses nun hospital de Guadalajara por afeccións respiratorias.

Presumiu en vida de "seguir sendo o rei" e advertiu nas súas rancheiras que o día da súa morte teriamos que "chorar, chorar e chorar", como cantaba nun dos seus temas máis recoñecidos mundialmente: “Pero o día que eu morra sei que terás que chorar, chorar e chorar”.

A voz icónica do mariachi mexicano, un dos mellores do xénero xunto con Pedro Infante, Jorge Negrete e Javier Solis, apagouse de xeito definitivo. Estaba baixo coidado médico desde agosto.

Tiña seguidores en medio mundo e tamén en Galicia. Para eles hoxe chegou a hora de chorar o rei. Con 55 anos de carreira, uns 100 millóns de álbums e máis de 75 millóns de discos vendidos por todo o mundo tivo tamén unha gran traxectoria cinematográfica.

Pai do tamén recoñecido cantante Alejandro Fernández, interpretou como poucos as rancheiras O Rei ou Volver, volver e conta entre os seus múltiples galardóns con dous Premios Grammy e oito Grammys Latinos.

Despediuse dos escenarios en abril de 2016 aos 76 anos nun espectacular concerto no estado Azteza de México ante máis de 90 mil espectadores.