Morre o cativo de nove meses ferido no incendio en Alcorcón
Morre o cativo de nove meses ferido no incendio en Alcorcón
A nai permanece grave, aínda que estable
O neno de nove meses que se intoxicou gravemente por inhalación de fume tras unha explosión nos baixos dun edificio da localidade madrileña de Alcorcón o xoves pasado faleceu este luns pola tarde no hospital La Paz de Madrid, segundo confirmaron a EFE fontes do centro hospitalario.
No sinistro morreu o seu irmán de 5 anos e a súa nai foi ingresada nun hospital por intoxicación grave.
O suceso ocorreu ás 19:15 do xoves nos locais situados na planta baixa duns edificios de recente construción na rúa Oslo de Alcorcón.
O incendio no local producírono probablemente as faíscas dunha radial que manipulaban uns operarios. Iso dixo o xefe dos bombeiros do municipio Raúl Esteban, quen descartou que as chamas tivesen a súa orixe nunha explosión por escape de gas ocorrida ao perforar accidentalmente unha tubaxe, como se informou nun primeiro momento.
O lume xerou unha gran cantidade de fume negro e denso que se espallou rapidamente polas vivendas e as zonas comúns dos edificios anexos.
Unha muller de 30 anos e os seus dous fillos, de 5 anos e 9 meses, que vivían encima do establecemento, na terceira planta, sufriron intoxicacións severas por inhalación de fume e entraron en parada cardiorrespiratoria.
Os sanitarios do Summa 112 lograron revertela no caso da nai e do fillo máis pequeno, pero non no do maior, que faleceu.
A nai atopábase "estable dentro da gravidade" na Unidade de Grandes Queimados do hospital de Xetafe, mentres que o seu bebé, que agora acaba de falecer, tiña un "prognóstico reservado" no hospital La Paz.
O funeral polo bebé celebrarase mañá, martes, na parroquia da nosa Señora da Asunción de La Cumbre, en Alcorcón.
