A xuíza cita como investigado o fiscalista da parella de Ayuso
Comparecerá o 6 de maio a petición da Fiscalía de Delitos Económicos
A investigación céntrase en dous delitos fiscais e un posible falseamento documental
Alberto González Amador. Europa Press/Gustavo Valiente.
A xuíza Inmaculada Iglesias, titular do Xulgado de Instrución número 19 de Madrid, citou en calidade de investigado o fiscalista Javier Gómez Fidalgo, asesor da parella da presidenta da Comunidade de Madrid, Isabel Díaz Ayuso, por suposta cooperación nunha presunta fraude fiscal.
A citación, fixada para o 6 de maio, responde a unha petición da Fiscalía de Delitos Económicos. O Ministerio Público considera que Gómez Fidalgo puido actuar como cooperador necesario dos delitos fiscais que se investigan, en concurso cun presunto delito de falsidade en documento mercantil.
Segundo o escrito do fiscal, Gómez Fidalgo foi o autor e presentador das autoliquidacións do imposto de sociedades da empresa Masterman & Whitaker, correspondentes aos exercicios 2020 e 2021. A mercantil fora adquirida en decembro de 2020 por Alberto González Amador, parella de Ayuso, por preto de medio millón de euros malia que, segundo un informe da Axencia Tributaria, carecía de valor real.
Outra persoa, chamada a declarar como testemuña
Ademais, o fiscal solicita tomar declaración como testemuña a María Blanca de la Encarnación López Crespo, quen presentou as autoliquidacións da empresa Maxwell Cremona nos mesmos exercicios.
O Ministerio Público sinala que, no caso de López Crespo, non existen indicios suficientes de criminalidade neste momento procesual, aínda que o seu testemuño podería achegar información relevante sobre os feitos investigados.
A causa segue aberta pola presunta comisión de dous delitos contra a Facenda Pública e un posible delito de falsidade documental, nun caso que afecta a contorna máis próxima da presidenta madrileña.
