A UE considera factible que Putin faga un ataque nuclear táctico

A estas alturas é evidente que unha guerra lóstrego en Ucraína fracasou e algúns analistas sinalan que Rusia está a preparar unha ofensiva de maior calado para os próximos días. Neste contexto, a Unión Europea xa considera a posibilidade de que un Putin illado internacionalmente chegue a utilizar armas nucleares tácticas en caso de que se atasque a invasión e se dilate no tempo.

 "Apertar ese botón non significa unha guerra termonuclear global. Probablemente o primeiro que querería demostrar é que está disposto, que para iso o que fai é sinalizar, como se chama en termos estratéxicos, sinalizar que está disposto a levar a cabo unha operación en escalada empezando cun ataque nuclear táctico a un obxectivo militar cunha bomba nuclear de pouco tamaño", sinala Rodrigo Rodríguez Costa, analista de Seguridade e Defensa.

O delegado da Unión Europea en Rusia fala xa abertamente desta posibilidade. Formaría parte dunha vella táctica do Exército ruso de "escalar para desescalar", pero de aí a unha guerra nuclear hai un abismo. Mentres, a Unión Europea mantén unha unidade case inédita ante a estratexia rusa de buscar a división.

"Dedicouse a enviar unha carta a cada un dos 27 ministerios de Asuntos Exteriores e a contestación da Unión Europea foi unha soa carta amosando unidade, firmeza e que estamos dispostos, como dicía o presidente Biden unha e outra vez, a defender cada anaco de terreo aliado. Non imos tratar de agredir a Rusia, pero non imos consentir que pase tamén as nosas liñas vermellas", indica Rodríguez Costa.

Nestes momentos dáse por imposible a declaración dunha zona de exclusión aérea en Ucraína e desde o comezo da invasión xa se negou a participación directa das tropas da OTAN no conflito. Todo por manter un delicado equilibrio e evitar unha catástrofe imprevisible.