Nove persoas morren e outras 44 están atrapadas tras a derruba dun edificio en Suráfrica

En Suráfrica os equipos de rescate traballan na localización das 44 persoas que permanecen atrapadas tras a derruba, este luns, dun edificio en construción na cidade costeira de George. Ata o de agora, a cifra de vítimas mortais ascende a nove, segundo informou este venres o xefe do goberno da provincia do Cabo Occidental Alan Winde nun comunicado publicado na súa conta da rede social X.

Das 81 persoas que se atopaban na obra no momento do derrubamento, un total de 37 foron rescatadas, entre elas, os falecidos e os 15 feridos en estado moi grave.

"Onte á noite chegou gran maquinaria de movemento de terras que inclúe dúas escavadoras de cinco toneladas, tres escavadoras de vinte toneladas con martelos e culleróns e un cargador frontal de tres cubos, ademais de camións para extracción e limpeza", explicou Winde.  "A pesar da introdución de maquinaria de gran tamaño, as técnicas de rescate seguirán sendo aplicadas de forma meticulosa e sensible por parte do equipo de xestión de desastres altamente capacitado e experimentado", agregou o mandatario.

A derruba ocorreu ás 14:09 hora local (12:09 GMT) do luns pasado nun edificio residencial de cinco plantas en construción. Mentres as familias das persoas atrapadas baixo os entullos esperan con ansiedade noticias sobre os seus seres queridos e celebran vixilias, máis de 600 funcionarios de xestión de emerxencias e desastres traballan incansablemente no lugar do accidente.

"Vostedes son verdadeiros heroes e estamos inmensamente agradecidos por todo o que están a facer neste momento tan difícil", dixo Winde. O presidente de Suráfrica Cyril Ramaphosa enviou este martes o seu "máis sentido pésame aos familiares e amigos" dos falecidos e subliñou que "as investigacións sobre a causa do incidente deben ter como obxectivo (...) evitar que se repita este desastre".