Feijóo anuncia a súa candidatura a presidir o PP porque se sente "preparado"

Nun acto multitudinario no Multiusos do Sar, en Santiago de Compostela, e ante a Xunta Directiva do PPdeG, o presidente do PPdeG e da Xunta Alberto Núñez Feijóo oficializou esta tarde a súa candidatura para liderar o PP porque se sente "preparado" e porque considera que pode, "xunto a un partido unido", lograr o obxectivo que ten, que é o de conseguir gobernar en España. Feijóo engadiu que "non vén a insultar a Sánchez, vén a gañarlle a Sánchez".

Feijóo marcou a súa folla de ruta se se converte en presidente do PP tras o congreso extraordinario de abril para conseguir un partido "unido" que sexa "sólido, solvente e claro". Un PP que "diga non cando haxa que dicir non e que diga si cando toque dicir si, con toda firmeza e honestidade".

Advertiu, tamén, que é posible gañarlle ao goberno bipartito, se o congreso do PP "non vai de vencernos uns aos outros" e instou a implicárense todos para volver gañar a confianza "dos dez millóns de votos" que tivo o PP.

Feijóo tamén aproveitou a súa intervención para explicar por que en 2018 non deu ese paso adiante e agora si. Dixo: "En 2018 fallar a Galicia sería fallarme a min mesmo, pero hoxe sinto que fallar ao PP sería fallar a Galicia e ao resto de España". Aínda así, o presidente do PPdeG recoñeceu que tivo dúbidas. Dixo que ademais da súa situación persoal, hai unha política en España de "revanchismo e de trincheira" en que non cre porque, defendeu "a única confrontación debe ser a das ideas e propostas".

Feijóo, visiblemente emocionado, e aclamado polos presentes, asegurou que non deixará "desde o primeiro partido de España de defender os intereses de Galicia, que tamén son os de España". E rematou comprometéndose a ser, "ocorra o que ocorra en Sevilla", "o mesmo servidor público". Rematou a súa intervención cun "grazas" repetido.