O BNG desautoriza a moción de censura en Muxía "porque participa o PP" e expedienta a súa edil

O BNG desautorizou a moción de censura rexistrada este luns contra o alcalde socialista de Muxía (A Coruña) Iago Toba, que está asinada pola súa única concelleira. Xa se propuxo a apertura dun expediente a Mercé Barrientos, que deberá ser tratado polo Consello Comarcal da Costa da Morte.

A decisión foi adoptada pola Executiva Nacional do Bloque na súa reunión deste luns á tarde, tras a cal, a formación frontista trasladou que non avalarán "ningunha" moción de censura que implique a participación do PP.

Nacionalistas e populares acordaron a presentación dunha moción de censura contra o socialista Iago Toba para entregar a Alcaldía ao portavoz de Independentes por Muxía, o expatrón maior da confraría de pescadores Francisco Javier Sar.

A executiva da formación frontista remarca que, na liña dos acordos do Consello Nacional, o seu máximo órgano de dirección entre asembleas, os seus grupos e edís municipais non facilitarán "ningunha moción de censura que implique a participación do PP".

Rexeita a actitude "despótica e pouco democrática" de Iago Toba e critica que a direción do PSdeG non tomase medidas

Ademais, o BNG carga contra a actitude "despótica e pouco democrática" do actual alcalde, o socialista Iago Toba, ao que acusa de xerar "un clima de crispación do que é o único responsable e que en nada beneficia a boa gobernanza do concello".

O órgano executivo do Bloque tamén dirixe as súas críticas cara ao PSdeG, ao que responsabiliza de ser perfectamente coñecedor desta "actitude de desprezo" cara á oposición do seu alcalde en Muxía e de non adoptar "ningunha medida respecto diso".

Os tres partidos da oposición no Concello de Muxía (A Coruña) rexistraron este luns a moción de censura contra o alcalde socialista deste municipio Iago Toba e propuxeron como candidato á Alcaldía o portavoz de Independentes por Muxía, o expatrón maior da confraría de pescadores Francisco Javier Sar.

A censura está asinada por PP, partido maioritario da oposición con 3 edís; Independentes por Muxía (IxM), con dous concelleiros, e a concelleira do BNG. O pleno para votar a moción e investir o novo alcalde celebrarase o próximo 7 de outubro ás 12:00 horas.

O socialista Iago Toba leva gobernando en Muxía cinco anos, pero desde os comicios locais de 2023 faino en minoría. Tras esas eleccións, nas que o PSdeG baixou de sete a cinco representantes, Toba foi investido cos únicos votos do seu grupo, mentres que os grupos da oposición non alcanzaron un acordo para conformar unha maioría alternativa.

O PP di que renunciou á alcaldía para desbloquear "unha situación absolutamente insostible"

A portavoz do PP Sandra Vilela incidiu en que o acordo para a moción de censura non foi "algo improvisado" nin "froito dunha rabecha", senón resultado do diálogo e a negociación e tamén dunha importante concesión por parte do grupo popular, que aceptou renunciar á Alcaldía para desbloquear unha "situación absolutamente insostible".

"Tres partidos moi diferentes deixamos de lado o que nos separa para unirnos polo ben de Muxía", proclamou, á vez que censurou a actitude do rexedor socialista, "incapaz" de negociar, dialogar ou debater para chegar a acordos coa oposición, a pesar de gobernar en minoría.

O independente Sar, candidato á alcaldía, subliña que deixaron á parte "intereses partidistas" por responsabilidade cara aos veciños

Na mesma liña, o líder de Independentes por Muxía Francisco Javier Sar destacou que a oposición primou a súa responsabilidade cara aos veciños, deixando de lado "intereses partidistas" e, despois de que non fose posible o acordo tras as eleccións locais, agora pactaron unha censura para poñer fin ao mandato de Iago Toba. "Debería ser antes", explicou, tras sinalar que o goberno do socialista se caracterizou pola "falta de comunicación" e as "malas formas" co resto da corporación municipal.

Sar, que asumirá a Alcaldía, se non hai sorpresas, no pleno do próximo 7 de outubro, recoñeceu que "ninguén dixo que sexa fácil" a nova etapa, a falta de coñecer como se conformará o próximo goberno local, pero garantiu que "o primeiro será cambiar as formas" no Concello.

"Unha situación de excepcionalidade democrática", di a edil do BNG

Finalmente, a portavoz do BNG, Mercé Barrientos, recalcou que o que ocorre en Muxía é "unha situación de excepcionalidade democrática", cun rexedor que incorre continuamente en "insultos" e desprezos persoais cara á oposición, con comentarios vexatorios e machistas e con falta de xestión política e de atención ás necesidades dos veciños. E todo iso, engadiu, sen que o PSdeG fixese "nada por rebaixar ese nivel de agresividade", chegándose a unha situación "imposible de reconducir".

De feito, lembrou que no pleno de investidura de xuño de 2023 o BNG non votou o candidato socialista, algo que é "unha anomalía", pero foi unha decisión consciente (o seu voto foi para IxM) porque coñecía os "precedentes" e Toba "non estaba capacitado" para asumir o goberno local.

Por outra banda, volveu insistir en que o BNG "nunca" dará unha Alcaldía ao PP, do que o diferencia "unha ideoloxía diametralmente oposta". Por iso, aceptou o acordo para a censura e para propoñer a Sar como alcalde, poñendo fin así a "16 meses delirantes".

Gómez Besteiro fala de "aberración"

Para o secretario xeral do PSdeG José Ramón Gómez Besteiro é "unha aberración" que o edil "menos votado" nas municipais do ano 2023 se converta no alcalde co apoio dos populares e dos nacionalistas. Besteiro non se mostrou estrañado coa postura do PP pero si coa do BNG polo seu "xiro antidemocrático e antisocial" de facer que "quen ten menos votos sexa quen dispoña da Alcaldía".

Tamén se pronunciou o presidente da Xunta e líder do PP galego Alfonso Rueda, que remitiu ao PP provincial da Coruña para un pronunciamento definitivo. En todo caso, remarcou que, en materia de acordos para gobernar, os populares non poñen "cordóns sanitarios".