O Burela golea o Poio (9-3) e clasifícase para a final da Liga
O Burela golea o Poio (9-3) e clasifícase para a final da Liga
O partido rachou na segunda metade, que comezou con empate a un
Foi un castigo excesivo para o Poio Pescamar, que se despide dunha temporada histórica
O Burela Pescados Rubén aproveitou o factor pista que acadara na Seca no primeiro partido da semifinal e, cunha goleada por 9-3, pechou a serie contra o Poio Pescamar por 2-0 e meteuse na gran final polo título.
As da Mariña comezaron con forza e, aos 31 segundos, Irene Samper anotaba o primeiro cun forte remate. O Poio Pescamar amosou durante gran parte do partido unha gran capacidade para refacerse despois das labazadas das locais. E empatou o encontro no treito final cunha bonita contra culminada por Anna Escribano.
Na segunda parte repetiuse a historia da primeira. 37 segundos tardou Peque en facer o 2-1. Despois chegaría un minuto tolo, en que marcaron Dany, Laura Uña e Peque para deixar o partido co 4-2. E, xusto a seguir, Irene marcaba o 4-3.
A expulsión de Luci por dobre cartón resultou determinante. Malia que o Burela non foi quen de aproveitar a superioridade, si que acabou desequilibrando o choque ao seu favor. Foi cos goles de Irene Samper e Emilly.
Co 5 para 4 do Poio, o Burela sentenciou. Dani, Patricia e Saki acabaron asinando o 9-3 final, que mete na gran final ao Burela, e representa un castigo excesivo para o Poio logo dunha gran temporada.
