O cadro clínico do papa "é complexo" e requirirá unha hospitalización "adecuada"

As probas realizadas nos últimos días e este luns ao papa Francisco "demostraron unha infección polimicrobiana do tracto respiratorio que obrigou a modificar aínda máis a terapia" e "o cadro clínico complexo requirirá dunha hospitalización adecuada".

"Todas as probas realizadas ata o momento son indicativas dun cadro clínico complexo que requirirá de hospitalización adecuada", lese no comunicado do Vaticano, que fai prever que Francisco seguirá ingresado aínda varios días, despois de que entrara o venres no hospital Gemelli de Roma. 

"O Santo Pai continúa sen febre e continúa co tratamento prescrito. As condicións clínicas son estables", indícase no último comunicado sobre o estado do pontífice.

Francisco, de 88 anos, "recibiu a Eucaristía e logo dedicouse a algunhas actividades laborais e á lectura de textos", agrega a Santa Sede, que por primeira vez fai referencia ao traballo do papa desde o seu ingreso hai catro días no hospital.

Ademais, o papa mostrouse "conmovido polas numerosas mensaxes de agarimo e proximidade que segue recibindo nestas horas".

"En particular, desexa expresar o seu agradecemento a quen se atopa actualmente hospitalizados, polo agarimo e amor que expresan a través dos seus debuxos e bos desexos; El ora por eles e pide que oren por el", conclúe a nota.

Polo de agora, non se falou dunha data para que se lle dea a alta.

Polo momento, o Vaticano informou de que se anulou a audiencia xeral deste mércores, mentres que algúns medios aseguran que o domingo tampouco estaría prevista a presenza do papa na misa polo Xubileu dos diáconos, aínda que isto non foi confirmado oficialmente.