O ministro Bolaños, sorprendido pola citación para declarar como testemuña no caso Begoña Gómez
Con todo, di que acudirá encantado e que intentará ser útil para a investigación
O PP reprochoulle no Senado que pertenza a un Goberno "enlamado pola corrupción"
O ministro de Presidencia, Félix Bolaños, amosouse sorprendido pola citación do xuíz Peinado para declarar como testemuña no caso Begoña Gómez. Así e todo, asegurou que acudirá encantado e que intentará ser útil para a investigación co seu testimonio.
O PP acusouno de pertencer a un Goberno, din, enlamado pola corrupción.
"Amnistía, indultos, sedición, condonación da débeda, todos son pagamentos de corrupción política para mercar tempo na Moncloa. O sanchismo tamén está enlamado na corrupción económica, por exemplo, coas corruptelas da familia de Sánchez. De feito, señor ministro, chamárono a declarar", di Alicia García, senadora do PP.
"Vexo que unha citación como testemuña, xa que non se me acusa de nada, parécelle unha deshonra. Pois para min é unha oportunidade para colaborar coa xustiza e, na medida das miñas posibilidades, achegar algo a esa investigación. Supoño que lle pareceu igual de deshonroso que Aznar e Rajoy tiveran que declarar no seu día como testemuñas nun caso de corrupción de verdade", responde o ministro de Presidencia, Félix Bolaños.
