O CHUAC, escollido mellor hospital de España en patoloxías complexas
O CHUAC, escollido mellor hospital de España en patoloxías complexas
As unidades de Nefroloxía, Neuroloxía e a Unidade da Dor tamén foron escollidas como as mellores da súa especialidade
O recoñecemento, que o CHUAC recibe por terceiro ano consecutivo, é un premio pola atención que este hospital público presta ás patoloxías complexas.
Dende a xerencia do hospital fano extensivo a todos os galegos que coa súa contribución, cos seus impostos, fan posible unha atención sanitaria de primeiro nivel.
"É un orgullo para todos os galegos porque en definitiva isto é o produto do investimento, do esforzo que fai o conxunto dos galegos e o conxunto do sistema de saúde", di Luís Verde, xerente deste centro sanitario.
Esforzo, coñecemento e experiencia sitúan o CHUAC no nivel cinco estrelas de excelencia no que se refire a atención de patoloxías de especial complexidade.
"O transplante ten un peso moi importante. Hai unha serie de patoloxías complexas que o fan necesario, e este é un hospital moi transplantador e que leva moitísimos anos facéndoo, pero tamén lidera noutras patoloxías, como enfermidades máis minoritarias, as enfermidades raras", explica Verde.
O premio que promove a Cátedra de Innovación e Xestión Sanitaria da Universidade Rey Juan Carlos recoñece tamén os servizos de Nefroloxía, Neuroloxía e a Unidade da Dor do CHUAC como os mellores na súa especialidade.
