O Constitucional exonera a Griñán e anula parte da condena por prevaricación a Manuel Chaves no caso dos ERE

O Tribunal Constitucional (TC) estimou parcialmente o recurso do expresidente da Xunta de Andalucía José Antonio Griñán e anula o delito de malversación polo que foi condenado a seis anos de cárcere polo "procedemento específico" de financiamento dos expedientes de regulación de emprego (ERE) fraudulentos con cargo aos fondos autonómicos.

Ademais, o Constitucional exonerou o tamén  expresidente andaluz Manuel Chaves de parte da condena por prevaricación pola que foi condenado a nove anos de inhabilitación polo "procedemento específico" de financiamento dos expedientes de regulación de emprego (ERE) fraudulentos con cargo aos fondos autonómicos.

Fontes xurídicas consultadas por Europa Press confirman que a maioría do Pleno avalou o borrador do relatorio da vicepresidenta Inmaculada Montalbán, que propoñía anular a súa condena e ordenar á Audiencia de Sevilla que dite unha nova que se limite á posible prevaricación cometida entre 2000 e 2001.

O tribunal informou que os seus maxistrados declararon que se vulnerou o dereito á legalidade penal e por iso ordena retrotraer as actuacións para que se "dite un novo fallo respectuoso cos dereitos fundamentais infrinxidos".

Como nos casos anteriores relativos aos ERE, a votación pechouse con sete votos a favor e catro en contra. A sentenza conta cos votos particulares dos catro maxistrados da á conservadora: Ricardo Enríquez, Enrique Arnaldo, César Tolosa e Concepción Espejel.