Policía e fiscalía rexistran a casa de Boluarte e a sede do Goberno peruano

A fiscalía anticorrupción e a División de Investigación de Delitos de Alta Complexidade (Diviac) da Policía Nacional do Perú (PNP) rexistraron a vivenda da Presidenta do país, Dina Boluarte, e a sede do Goberno en Lima. 

Estas inspeccións forman parte dunha pescuda preliminar aberta o pasado 18 de marzo contra a mandataria pola presunta comisión dun delito de enriquecemento ilícito, en relación cunha colección de reloxos de luxo. 

"Intolerable atropelo"

O primeiro ministro, Gustavo Adianzén, amosouse "indignado" pola actuación dos axentes que racharon a fechadura da vivenda da Presidenta. Considera que se trata dunha acción "absolutamente desproporcionada".

"Produciuse un intolerable atropelo á dignidade da presidencia da República e á nación que ela representa".

Insiste en que Boluarte, que dixo non ter ningunha irregularidade patrimonial, "en todo momento presentou a súa colaboración ao Ministerio Público".

Adianto electoral

Dina Boluarte chegou á presidencia en 2022, tras o autogolpe de estado fracasado de Pedro Castillo, do que foi compañeira de fórmula presidencial pola esquerda, e agora mantense no cargo co apoio da dereita.

Aínda que é rexeitada polo 90 % da poboación, logrou eludir de momento o adianto electoral que reclama a maioría do país.

A Presidenta do Goberno do Perú nunha imaxe de arquivo (Reuters)