O FBI buscou documentos clasificados sobre armas nucleares na casa de Trump

O rexistro na casa do expresidente dos Estados Unidos Donald Trump o pasado luns tiña como obxectivo atopar documentos clasificados sobre armamento nuclear que o exmandatario sacou da Casa Branca, segundo publicou este xoves o diario The Washington Post.

O Post, que citou fontes anónimas próximas á investigación, indicou que a redada responde á preocupación no Goberno estadounidense de que os documentos que Trump levou consigo ao deixar a presidencia e que conteñen información sensible caian en malas mans.

As fontes non aclararon se a información que supostamente se atopaba na casa de Trump era referente a armamento nuclear en posesión dos EUA ou de potencias estranxeiras, e tampouco detallaron se efectivamente se atopou este material.

O fiscal xeral dos Estados Unidos, Merrick Garland, autorizou persoalmente a decisión de solicitar a orde de rexistro do pasado luns á residencia de Trump en Florida e pediu este xoves autorización a un tribunal do sur deste estado para que faga pública dita orde.

Trump aceptou a petición realizada polo fiscal xeral e animou á publicación "inmediata" da orde de rexistro. "Non só non me vou opoñer á publicación de documentos relacionados coa redada impropia dos EUA, inxustificada e innecesaria da miña casa en Palm Beach, senón que vou un paso máis aló e animo á súa publicación inmediata", escribiu Trump nas redes sociais.

A orde de rexistro foi autorizada por un tribunal federal e o inventario de propiedade é un documento que a lei federal esixe que as forzas da orde deixen ao dono do lugar.