O Goberno nega que España participara nas negociacións entre Edmundo González e o goberno de Maduro
O Goberno nega que España participara nas negociacións entre Edmundo González e o goberno de Maduro
Alberto Núñez Feijóo pide a destitución do embaixador español en Caracas e a dimisión do ministro de Exteriores
A Eurocámara recoñece a Edmundo González presidente lexítimo de Venezuela
O lider opositor venezolano Edmundo González Urrutia reiterou este xoves que o réxime chavista obrigouno a recoñecer a vitoria de Maduro e a irse de Venezuela.
"Fun obrigado a saír do meu país a causa de presións inenarrables e de ameazas extremas", dixo.
Desde Caracas desménteno.
Jorge Rodríguez, o presidente da Asamblea Nacional de Venezuela, fixo unha comparecencia pública e dixo: "El buscounos a nós, e non houbo ningún tipo de situacion en que puidera sentirse violentado".
O presidente do Parlamento venezolano amosou as fotos do encontro, na sede da embaixada española e coa presenza do embaixador.
Para o Partido Popular é unha proba de que a diplomacia española está ao servizo do réxime chavista.
"O embaixador de Venezuela ten que ser reemprazado, o ministro de Asuntos Exteriores e o presidente do Goberno ten que dar explicacións inmediatas", di Alberto Núñez Feijóo.
O Goberno desmárcase das relacións entre o líder opositor e o executivo de Maduro e nega coaccións a Edmundo Gonzalez.
José Manuel Albares, ministro de Asuntos Exteriores, afirma: "España non ten absolutamente nada que ver con ningún tipo de negociación nin de documento subscrito entre Edmundo González e o Goberno de Venezuela".
O ministro esíxelle a Núñez Feijóo que desautorice o eurodeputado Esteban González Pons, que acusou o Goberno de, dixo literalmente, estar implicado no golpe de Estado en Venezuela. Desde o PSOE piden a súa dimisión.
