O Goberno pide o traslado urxente dos restos de Queipo de Llano

O Goberno enviou unha carta ao Irmán Maior da Irmandade da Macarena para que proceda, "á maior brevidade", á exhumación e posterior traslado dos restos dos xenerais Gonzalo Queipo de Llano e de Francisco Bohórquez.

Nunha carta, o secretario de Estado para a Memoria Democrática, Fernando Martínez López, fai esta petición ao obxecto de cumprir coa nova Lei de Memoria Democrática que entrou en vigor o pasado venres.

Os restos mortais de Queipo de LLano, dirixente da sublevación de 1936 e responsable da represión en Andalucía en datas posteriores, reposan dende o ano 1951 baixo o camarín da Virxe da Basílica da Esperanza Macarena en Sevilla.

No templo tamén se atopan os restos mortais de Francisco Bohórquez Vecina, auditor de guerra e responsable da execución de sentencias con aplicación de bando de guerra.

Na misiva, lémbrase que a nova norma establece que "os restos mortais de dirixentes do golpe militar de 1936 non poderán ser nin permanecer inhumados nun lugar preeminente de acceso público, distinto a un cemiterio, que poida favorecer a realización de actos públicos de exaltación, enaltecemento ou conmemoración das violacións de dereitos humanos cometidas durante a guerra ou a ditadura".

Por iso, reclama ao Irmán da Irmandade da Macarena que poña fin a esta situación "como mostra de respecto cara ás vítimas e aos seus familiares" e facilite "ao máximo" e "o máis axiña posible" a realización dos trámites necesarios para a exhumación e traslado dos restos de Queipo de Llano e de Bohórquez Vecina.