O líder do partido gobernante surcoreano pide suspender "de inmediato" o presidente Yoon

O líder do partido gobernante en Corea do Sur, Han Dong-hoon, instou este venres a suspender "de inmediato" ao presidente Yoon Suk-yeol das súas funcións, tras saberse que o mandatario ordenara os arrestos dos principais líderes políticos, incluíndo ao propio Han, durante a lei marcial que proclamou sorpresivamente o martes.

"Ante os feitos revelados recentemente, creo que é necesario suspender de inmediato ao presidente Yoon Suk-yeol das súas funcións para protexer á República de Corea e ao seu pobo", dixo Han durante unha reunión de emerxencia da súa formación, o conservador Partido do Poder Popular (PPP), na Asemblea Nacional.

Han indicou que confirmou "con probas fidedignas" que Yoon deu ordes de detelo a el, líder do seu propio partido, ou a Le Jae-myung, líder da principal formación opositora, o Partido Democrático (PD), e asegurou que estas "accións radicais" que poñen ao país "en gran perigo" poderían repetirse se o presidente, ao que o Parlamento someterá este sábado a unha votación para destituílo, segue no poder.

O PPP convocou unha xunta de emerxencia de todos os seus parlamentarios para tratar o voto que emitirán na sesión parlamentaria prevista para aprobar ou non a destitución de Yoon.

As palabras de Han interprétanse como un anticipo do que sería unha nova mensaxe para os parlamentarios do PPP -aos que na véspera pedira unidade de voto para evitar que se aprobase a destitución de Yoon- para que agora voten a favor da moción para inhabilitalo.

Han reuniuse horas despois con Yoon -ao que non se viu publicamente desde que revogou a lei marcial á primeira hora do mércores- aínda que apenas revelou nada sobre o contido do encontro.

O líder do PPP dixo que nada do que dixo o presidente durante esta reunión lle fai cambiar de opinión sobre a súa destitución e engadiu que Yoon "non tomará ningunha medida extraordinaria de momento" en relación á posibilidade de que o mandatario decida impoñer de novo a lei marcial.

Medios locais como o diario Chosun, o que máis circulación ten en Corea do Sur, adiantaran o xoves que Yoon deu ordes ao Comandante de Contraintelixencia, Yeo In-hyung, para que detivese a Han, a Lee ou ao presidente da Asemblea Nacional, o independente Woo Won-shik, ao considerar que eran elementos "antiestatais", e que se chegaron a mobilizar unidades militares para preparar os mencionados arrestos.

O propio líder do opositor PD, Le Jae-myung, pediu tamén inhabilitar a Yoon de inmediato tras coñecerse as palabras de Han.  

O xefe do Comando das Forzas Especiais surcoreanas, Kwak Jong-keun, afirmou este venres que rexeitou as ordes do Ministerio de Defensa de sacar pola forza aos parlamentarios que se negaron a abandonar a Asemblea Nacional durante a lei marcial proclamada o martes.

"Tras entrar na Asemblea Nacional, o entón ministro de Defensa, Kim Yong-hyu, ordenoume evacuar os deputados da sala principal", dixo o lugartenente en declaracións durante unha reunión con parlamentarios das forzas da oposición, recollidas pola axencia local Yonhap.

"Decidín incumprir esa orde incluso sabendo que era unha insubordinación, xa que con base no meu xuízo, evacuar a deputados da Asemblea era claramente un acto ilegal", dixo o xefe do comando militar especial.

Pola súa parte o ministro de Defensa en funcións de Corea do Sur, Kim Seon-ho, negou que se estea preparando unha segunda lei marcial despois de que distintas voces alertasen sobre accións "sospeitosas" do Exército e dixo que mesmo se se propuxese esa medida as Forzas Armadas non a aceptarían "de ningunha maneira".

Mentres, o índice de aprobación popular para o presidente de Corea do Sur, Yoon Suk-yeol, caeu ata o 13 % tras a convulsión desatada pola súa declaración o martes da lei marcial de emerxencia, revogada horas despois, segundo unha enquisa de Gallup Korea.