O papa Francisco padece unha infección nas vías respiratorias e febre leve

O papa Francisco padece unha infección nas vías respiratoria e unha "leve febre", informou este venres a Santa Sé nun comunicado, despois de que fose hospitalizado en Roma debido a unha bronquite.

"O santo padre, tras a persistencia da bronquite destes días, someteuse a unhas análises especializadas e comezou a terapia farmacolóxica hospitalaria", di a nota.

Os primeiros resultados, agrega, "demostran unha infección nas vías respiratorias".

"As súas condicións clínicas son discretas. Presenta unha alteración febril leve", termina.

O pontífice arxentino, de 88 anos, tivo que ser hospitalizado este venres no Policlínico Gemelli de Roma por unha bronquite que non lle dá tregua cada inverno e que nos últimos días lle imposibilitou ler algúns discursos.

Por iso, anulou a súa participación en audiencias ata o vindeiro luns, como a súa presenza no Xubileu dos artistas ou a súa visita aos estudios cinematográficos romanos de Cinecittà.

"Esta mañá , ao final das audiencias, o papa Francisco foi ingresado no Policlínico Agostino Gemelli para realizar algúns exames diagnósticos necesarios e continuar o tratamento en contorna hospitalaria da bronquite aínda en curso", foi o conciso comunicado do Vaticano, que non especificou o tempo que deberá estar o papa no hospital.

Tras a publicación deste primeiro parte, o voceiro vaticano, Matteo Bruni, afirmou que "o papa está sereno, de bo humor e leu algún xornal".

Desde principios de febreiro o papa explicou que sufría un "forte arrefriado", como el mesmo dixo na audiencia xeral do mércores 5 de febreiro e nos días sucesivos mantivo as súas audiencias, pero na súa residencia, a Casa Santa Marta, para non trasladarse ao palacio pontificio "debido a unha bronquite", informou a Santa Sé.

Esta é a cuarta vez que o papa ten que ser hospitalizado no Gemelli.

No pasado, o pontífice arxentino sufriu problemas de gripe e respiratorios que mesmo o obrigaron a estar ingresado tres días en marzo de 2023 e en novembro de 2023 estes problemas respiratorios obrigárono a cancelar a súa viaxe a Dubai pola COP28.

A finais de febreiro de 2024 acudiu ademais á sede do Gemelli na Illa Tiberina para realizar unha tomografía computarizada de control dos pulmóns.

En xuño de 2023, o pontífice arxentino tivo que ser de novo ingresado para unha operación por unha hernia abdominal, na que se lle retiraron algunhas adherencias, e colocóuselle unha malla na parede do abdome e estivo nove días no hospital.

Mentres que en xullo de 2021 foi hospitalizado durante dez días para operalo dunha estenose diverticular sintomática do colon.

En 2019, o papa Francisco someteuse a unha cirurxía de cataratas e a operación tivo lugar na Clínica Pío XI de Roma.

Ademais, padece desde hai varios anos un problema no xeonllo que o obriga a utilizar un bastón e unha cadeira de rodas, pero nunca quixo operarse xa que asegura que ten problemas coa anestesia xeral.